بەشی سێیەمی شەقامی 120 مەتری هەولێر دەکرێتەوە

رووداو  هەولێر

هادی سەلیمی، پەیامنێری رووداو لە هەولێر رایگەیاند: بڕیارە ئێوارەی ئەمڕۆ بەشی سێیەمی پرۆژەی شەقامی 120 مەتری هەولێر بکرێتەوە، ئامادەکارییەکان تەواوکراون بۆ کردنەوەی به‌شی سێیه‌می پڕۆژه‌كه، کە‌ له‌ رێگەی هه‌ولێر - كۆیه‌ ده‌ستپێده‌كات تاوه‌كو رێگەی هه‌ولێر - كه‌ركووك.

شەقامی 120 مەتری هەولێر، درێژترین شەقامی شاری هەولێری پایتەختی هەرێمی کوردستانە، رێگەیەکی بازنەییە، چێوەکەی 38 کیلۆمەترە، گوژمەی کۆی پڕۆژەکە بە چوار کیلۆمەتری رێگەی گەزنەوە 459 ملیۆن دۆلارە.

بەشی یەکەمی لە ساڵی 2013 لەلایەن کۆمپانیای ئیکینجلەری تورکییەوە دەستکرا بە کارکردن تێیدا، پاش ئەوەی کەمتر لە نیوەی تەواوکرد، بە نیوە ناچڵ بەجێیهێشت، دواتر لەلایەن هێمن گرووپەوە دەستکرا بە دروستکردنی، کۆتا بەشی رێگەکەش کە نۆ کیلۆمەتری ماوە، بڕیارە هەر لەلایەن هێمن گرووپەوە جێبەجێبکرێت.

پرۆژەی شەقامی 120 مەتری هەولێر چەندین بەرزە پرد، ژێر پرد و پەرژینی خۆپاراستن لەخۆ دەگرێت، سەوزکردنی بەشێکیشی دیمەنێکی جوانی بە ئەندازەی رێگەوبان داوە.