بۆچوونی سەردانیکارانی پێشەنگەی رۆژهەڵاتی ناوەڕاست بۆ پەروەدە و فێرکردن لەبارەی قوتابخانەی تایبەت و حکومی جیاوازە

 

 

بەڕێوەبەری ئەو قوتابخانە تایبەتە پێیوایە نیوە زیاتری ئەو دایک و باوکانە بۆ ئەمساڵی خوێندن منداڵەکانیان ناونووس دەکەن.

 

ئاشتی سەعید، بەڕێوەبەری قوتابخانەی دەڵێت، "لە قوتابخانەی تایبەت، پۆلەکان تەنها دەتوانن 20 قوتابییان تێدابێت و نابێت وەکو حکومییەکان زۆربن، هەروەها ئەو مامۆستایانەی وەردەگیرێن بە سێ فلتەردا تێدەپەڕن و دەبێت خاوەن ئەزموونێکی باشیش بن."

 

خوێندنی تایبەت لە هەرێمی کوردستان لە گەشەدایە، چونکە قوتابخانەکانیان خواستی زۆریان لەسەرە.

 

سەید موزەفەر، فەرمانبەر دەڵێت، "قوتابخانە ئەهلییەکان گرنگییەکی باش بە قوتابی دەدەن و ئاگای زۆریان لێیان دەبێت، هەرچی حکومییەکانە وەکو جاران نییە گرنگیی باش بە خوێندن بدەن."

 

رێژین سدیق، مامۆستا ئاماژەی بەوە کرد، "پابەندییان زیاترە و ئەو گرنگییەی لە ئەهلییەکان هەیە، بەداخەوە لە حکومییەکان نییە."

 

مەرج نیە هەموو دایک و باوکێک قوتابخانە تایبەتییەکان بکەنە ناوەندی خوێند بۆ منداڵەکانیان. شۆخان ئەبوبەکر، مامۆستا پێیوایە، لە قوتابخانە "حکومییەکان زیاتر گرنگی بە لایەنی پەروەردەیی دەدرێت و لەوانەیە لە لایەنی خوێندنەوە پشتگوێبخرێن بەهۆی دواکەوتنی مووچەکەیانەوە، بەڵام لە ئەهلییەکان مووچەی باشتر و لەکاتی خۆیشی وەریدەگرن، بەڵام هەر حکومییەکە لای من پەسندە."

 

چرا غەفوور، فەرمانبەر گوتی، "باری مادیی زۆربەی خەڵک هێندە باش نییە کە منداڵەکانی بنێرێتە تایبەت و بەڕای منیش جیاوازییەکی ئەوتۆ لە نێوانیاندا نابینم."

 

زیابوونی توانای قوتابخانە تایبەتەکان کاریگەریی کردووەتە سەر قوتابخانە گشتییەکان، بەتایبەتی لە بردنی مامۆستا باشەکان، چونکە دەتوانن مووچەی باشتر و لە کاتی خۆشیدا بیدەن.

 

سەردار محەممەد، سەرپەرشتیاری پەروەردەیی ئاماژە بەوە دەکات، "تاڕادەیەک توانیویانە مامۆستای باشمان لێ ببەن و ئەمە شتێکی حاشاهەڵنەگرە، مووچەکەیان باشە و لە کاتی خۆیدا دەدرێت، هەروەها مووچەشیان لە قوتابخانە حکومییەکان هەیە."

 

لە دەرفەتێکی ئاوای وەکو ئەم پێشانگەیە، تاکە قوتابخانەیەکی حکومی بەشدار نییە تاوەکو ئاست و چۆنێتیی پەروەردە و فێرکردن بۆ دایک و باوکان بخەنەڕوو.