سنووری گوندێکی بناری قەندیل بۆردوومانکرا
رووداو دیجیتاڵ
سەرلەئێوارەی ئەمڕۆ سێشەممە، سنووری گوندێکی بناری قەندیل بۆردوومانکرا و ترس و دڵەڕاوکێیەکی زۆری بۆ هاونیشتمانیان دروستکردووە.
نەهرۆ عەبدوڵڵا، بەڕێوەبەری شارۆچکەی سەنگەسەر بە تۆڕی میدیایی رووداوی راگەیاند، کاژێر 4:15 خولەکی ئێوارەی سێشەممە، دەوروبەری گوندی بێپاڵان لە بناری چیای قەندیل بۆردوومانکراوە.
گوتیشی، لەبەرئەوەی ئەو شوێنە دوورە لە ئاوەدانی تاوەکو ئێستا زیانەکان نەزانراون، بەهۆی بۆردوومانەکەوە ترس و دڵەڕاوکێ لەلای گوندنشینان دروستبووە.
کامەران مەلا عوسمان، ئەندامى تیمى کوردستانى رێکخراوى CPT بۆ چاودێریکردنى بۆردوومانەکان، بە تۆڕی میدیایی رووداوی راگەیاند، بەگوێرەی بەدواداچوونەکانیان، نزیک کاتژمێر 4:20 خولەکى ئێوارە، دەوروبەری گوندى بێپاڵان بۆردومانکراوە و ئۆتۆمبێلێک کراوەتە ئامانج، بەڵام هیچ هاووڵاتییەکى مەدەنى زیانى پێنەگەیشتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ