سەرۆک بارزانی: جەوهەری دین، ئەخلاقە

 

بەناوی خوای گەورە و میهرەبان

 

پێشەکی، بەخێرهاتنێکی گەرمی هەمووتان دەکەم، میوانە بەڕێزەکان. بەخێربێن بۆ کوردستان، لانکەی پێکەوەژیانی نەتەوەیی و ئایینی.

 

پێش ئەوەی دەست بە گوتارەکەم بکەم، دەمەوێت جارێکی دیکە رایبگەیێنم، هاوبەشی هەموو مرۆڤدۆستانین لە جیهان بۆ لەدەستدانی پیاوێکی گەورەی ئاشتیخواز و مرۆڤدۆست، کە ئەویش قەداسەتی پاپایە.

 

ئەمە یەکەمجارە کۆبوونەوەیەکی لەم شێوەیە لە کوردستان رێکدەخرێت و مەبەست ئەوەیە کە جیهان ئاشنا ببێت بەو کولتوورە دەوڵەمەندەی لە کوردستان هەیە. لە دێرزەمانەوە ئەو کولتوورە لە کوردستان هەبووە، ئەویش کولتووری پێکەوەژیان و یەکدی قبووڵکردن، ئازادیی بیروڕا و ئایین و مەزهەبە. ئەو کولتوورە کە ئێمە شانازیی پێوە دەکەین و داکۆکییش دەکەین کە بەردەوام دەبین لەسەر ئەم رێگەیە.

 

ئۆمێدەوارم ئەم کۆبوونەوەیە یارمەتیدەر بێت بۆئەوەی ئەو برایەتی و پێکەوەژیانە لە کوردستان قووڵتر و فراوانتر بێت.

 

خوداپەرستی خاڵێکی هاوبەشە بۆ کۆکردنەوەی ئایینە جیاوازەکان. حەق جیاناکرێتەوە، گەیشتن بە حەق رێگەی زۆرە و ئایینە پیرۆزەکان هەموویان کە حەقیقەتی وەحدانییەتی خودایان قبووڵە، هەموویان بەدوای ئەو راستییەدا دەگەڕێن و پێویستە رێز لە هەموویان بگیرێت. جەوهەری ئایینیش ئەخلاقە. روومی دەفەرموێت، "حەق وەکو لووتکەی چیایە، چەندین رێگە هەن بۆ گەیشتن بە لووتکە، بەڵام ئامانج یەکە و ئەویش گەیشتنە بە حەق."

 

لە سەرەتای دەسەڵاتی تەریقەتی بارزان، بە رابەرایەتی شێخ عەبدولسەلام بارزانی و شێخ ئەحمەد بارزانی، رێزگرتن لە ئایینە جیاوازەکان و یەکترقبووڵکردن بەشێکی سەرەکیی بیروباوەری ئێمە بووە. ئەمەش پشتبەستنە بە فەرموودەی خودای گەورە کە لە قورئانی پیرۆزدا فەرموویەتی، "یا ایها الناس انا خلقناکم من ذکر و الانثی و جعلناکم شعوبا و قبائل لتعارفوا، ان اکرمکم عنداللە اتقاکم."

 

ئەمە ئایەتیکی قورئانی پیرۆزە و رێنیشاندەرە بۆ ئەوەی چۆن ئێمە لە سەر ئەم بیروبڕوایە بەردەوام بین، کە ئەویش پێکەوەژیان و یەکترقبووڵکردنە.

 

بە درێژایی مێژوو، کاتێک هێرش دەکرایە سەر کوردستان، زۆرداران هیچ فەرق و جیاوازییەکانیان نەدەکرد لە نێوان موسڵمان و مەسیحی و ئێزدی. هەموو گوندەکانیان سووتاند، هەموویان راگوێزران، لە هەموویان کۆمەڵکوژ کران، زیندەبەچاڵ کران. لە کۆتاییشدا لە شەڕی داعش (بوو) کە جیاوازیان نەکرد لە نێوان موسڵمان، مەسیحی و ئێزدی. تاوانی زۆر گەورەیان ئەنجامدا. لە بەرامبەر ئەمەدا، پێشمەرگە قارەمانەکان بە گیانفیداییەکی بێوێنە بەرگرییان لە هەموویان کرد و ئەفسانەی داعشیان تێکشکاند، بەڵام بە باجێکی زۆر زۆر گەورە کە ئەویش نزیکەی 12 هەزار شەهید و بریندارن.

 

با ئەمە سەرەتایەک بێت کە ئەم جۆرە کۆبوونەوانە ئەنجام بدرێن، بۆ ئەوەی هەموومان بزانین، بەر لە هەموو شتێک، هەموومان بەندەی خوداین و لە مرۆڤایەتیدا هەموومان براین، خۆشک و برای یەکترین.

 

بە یەکترقبووڵکردن، بە میهرەبانی و بە خۆشی هەموومان دەتوانین پێکەوە بژین، بەڵام بە زۆرداری (ستەمکاری) نە زۆردار دەتوانێت پشووبدات و نە زۆرلێکراو (زۆڵملێکراو) دەتوانێت پشووبدات. هەموو پێغەمبەرەکانیش، ئامووژگارییان ئەوە بووە کە دەستی برایەتی بۆ یەکتر درێژ بکەن و ئامووژگاری خەڵکیان کردووە بۆ پێکەوەژیان.

 

لە کۆتاییدا داوا دەکەم لە خودای گەورە کە رێنوێنی هەموو لایەک بکات، ئاشتی بەرقەرار بێت لە ناوچەکە و لە هەموو جیهان. برایەتی بەرقەرار بێت و هیودارم کاتێکی خۆش لە کوردستان ببەنە سەر. ئێمە شانازیتان پێوە دەکەیەن و جارێکی دیکە بەخێرهاتنێکی گەرمی هەمووتان دەکەین. سوپاسی هەمولە کۆتاییدا داوا دەکەم لە خودای گەورە کە رێنوێنی هەموو لایەک بکات، ئاشتی بەرقەرار بێت لە ناوچەکە و لە هەموو جیهان. برایەتی بەرقەرار بێت و هیودارم کاتێکی خۆش لە کوردستان ببەنە سەر. ئێمە شانازیتان پێوە دەکەیەن و جارێکی دیکە بەخێرهاتنێکی گەرمی هەمووتان دەکەین. سوپاسی هەموو ئەو بەڕێزانەش دەکەین کە ئەم کۆبوونەوە و ئەم بەرنامەیەیان رێکخستووە، دەستیان خۆش بێت.