رووداو دیجیتاڵ
سەرۆکی یەکێتیی مامۆستایانی کوردستان دەڵێت، بەهۆی بڕیاری وەزارەتی دارایی و ئابووریی هەرێمی کوردستانەوە، نزیکەی 10 هەزار مامۆستا و فەرمانبەر خانەنشین دەبن. داوا دەکات، بۆ پڕکردنەوەی بۆشایی لە ناوەندەکانی پەروەردە وانەبێژانی دابڕاو بخرێنە شوێنیان.
پێنجشەممە، 23-01-2025، ئەحمەد گەرمیانی، سەرۆکی یەکێتیی مامۆستایانی کوردستان بە تۆڕی میدیایی رووداوی گوت: "بەهۆی بڕیاری جێبەجێکردنی یاسای خانەنشینیی یەکگرتووی عێراق، نزیکەی 10 هەزار مامۆستا و فەرمانبەری وەزارەتی پەروەردەی هەرێمی کوردستان خانەنشین دەبن".
هەفتەی رابردوو، وەزارەتی دارایی و ئابووریی هەرێمی کوردستان لە راگەیێندراوێکدا رایگەیاند، یاسای خانەنشینیی یەکگرتووی ژمارەی 09ـی ساڵی 2014ـی عێراق جێبەجێ دەکرێت و ئەوانەی تەمەنیان دەبێتە 60 ساڵ خانەنشین دەکرێن.
ئەحمەد گەرمیانی گوتی، یەکێک لەو کێشانەی جێبەجێکردنی یاساکە دروستی دەکات، خانەنشینبوونی بەشێکی مامۆستایانی "بە ئەزموون و پێویستە بۆ ناوەندەکانی خوێندن."
سەرۆکی یەکێتیی مامۆستایان باس لەوەشدەکات: "بۆ ئەوەی بۆشایی لە قوتابخانەکان دروست نەبێ، داواکارین حکومەتی هەرێمی کوردستان رەزامەندی عێراق وەربگرێت بۆ دامەزراندنی گەنجی نوێ و ئەو وانەبێژانەی پێشتر خزمەتیان کردووە و بەهەر هۆکارێک بێت وازیانهێناوە".
سەرۆکی یەکێتیی مامۆستایان بڕیاری جێبەجێکردنی یاسای یەکگرتووی خانەنشینی بە "باش" زانی و داوای کرد، کە یاساکە جێبەجێ دەکرێت تەواوی شایستە داراییەکانی مامۆستایانی خانەنشین لە هەرێمی کوردستانیش هاوتای مامۆستایانی خانەنشینی عێراق بکرێت.
ئەحمەد گەرمیانی دەڵێت: "هەنگاوی یەکەم پێویستە ئەو 38 هەزار وانەبێژەی کراونەتە گرێبەست بکرێنە هەمیشەیی، دواتر مامۆستای دیکە لە شوێنی خانەنشینەکان دامەزرێندرێت".
بەپێی نووسراوەکەی وەزارەتی دارایی، ئەو فەرمانبەرەی خانەنشین دەکرێت، هەموو ئەو ماف و شایستانەی دەبێت کە یاسای خانەنشینی یەکگرتوو، ژمارە 9ی ساڵی 2014ی هەموارکراو پێی دەدات، ئەگەر هاتوو مەرجە یاساییەکانی شایستەبوونی تێدابێت.
سەرۆکی یەکێتیی مامۆستایان گوتی: "بڕیارەکەی وەزارەتی دارایی هەرێمی کوردستان ناچاری بووە، چونکە وەزارەتی دارایی عێراق پێی راگەیاندوون، کە نابێت لە دایکبووانی ئەو ساڵانە خانەنشین بوون دەیانگرێتەوە لەنێو لیستی مووچەدا هەبن".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ