هەڵەیەک روویدا! دووبارە هەوڵبدە
حوشترەکان لە چیایەکی نزیک دهۆک دەژین
رووداو دیجیتاڵ
وشکەساڵی و کەمی بارانباراین، وایکردووە بەشێک لە هاووڵاتییان حوشترەکانیان لە دەشتی نەینەوا ببەنە چیاکانی پارێزگای دهۆک. محەممەد عوبەید، خەڵکی کۆمەڵگەی ریسالەیە لە بەعاج و دەڵێت، ساڵێکە حوشترەکانی بردووەتە گوندی باجلۆر لە دهۆک و فێری ژیانی ئەوێ بوون.
حوشترەکان فێری بەرز و نزمیی چیاکان بوون و خۆیان لەگەڵ سرووشت و ژینگەی دهۆک راهێناوە. محەممەد عوبەید بە تۆڕی میدیایی رووداوی گوت، "لە ناوچەکانی ئێمەدا وشکەساڵییە و هاتووین بۆ نێو گژوگیای ئێرە، سوپاس بۆ خوا ئەو ناوچەیە بەپیتە و وشکەساڵی لێرە نییە. ئاو هەیە، گژوگیا هەیە. لە سەرەتادا کاتێک حوشترەکانمان هێنایە ئێرە گوتمان لێرە ناژین، بەڵام ئێستا سوپاس بۆ خوا لێرە دەژین و دەچنە سەرەوە و دێنە خوارەوە هەر هەستیشی پێناکەن."
حوشترەکان ژمارەیان 12یە، هەموویان مێن، تاوەکو ئێستا محەممەد نەیتوانیوە حوشترێکی نێریان بۆ پەیدا بکات تاوەکو زاوزێ بکەن و سوود لە شیرەکەی وەربگرێت. محەممەد دەڵێت، 21 حوشتری دیکەی ماوە، بەڵام لەبەر رێکاری ئەمنی، نەیتوانیوە بیانهێنێتە دهۆک. ئەو هاووڵاتییە 11 ساڵ پێش ئێستا چووەتە سنووری دهۆک و سەرەتا مەڕوماڵاتی بردووە.
جەعفەر باجلۆری، براگەورەی گوندەکەیە و دەڵێت، "چوون و جارێکی دیکە هاتنەوە، گوتمان بۆچی هاتنەوە، گوتیان: باران کەمە و بەهۆی وشکەساڵی ناچاربووین بگەڕێینەوە، ئێمەش بەخێرهاتنەوەمان کردن و گوتمان ئێرە ماڵی ئێوەیە."
گوندی باجلۆر بە دووریی حەوت کیلۆمەتر دەکەوێتە رۆژهەڵاتی دهۆک. لە چەند ساڵی رابردوودا کۆچی ئاژەڵدارانی نەینەوا بۆ سنووری پارێزگای دهۆک بەهۆی وشکەساڵییەوە زیادی کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ