هەورامان
رووداو- هەولێر
پەرلەمانتارێکی کۆمەڵی ئیسلامی رایدەگەیێنێ ئۆباڵی دوونیا و لە قیامەت لەسەر شانی ئەوپەرلەمانتارانەیە کە ئامادەی دانیشتنەکەی ئەمڕۆی پەرلەمانی کوردستان نەبوون.
هەورامان گەچێنەیی، پەرلەمانتاری کۆمەڵی ئیسلامی بە (تۆڕی میدیایی رووداو)ی راگەیاند، "ئەوەی گرنگە بە کاری پەرلەمانتاری و یاسایی خۆمان هەڵساوین و خۆڵیش ناخەینە چاوی هیچ کەسێک و لەو هەوڵەکانیشمان بەردەوام دەبن".
هەورامان گەچێنەیی، پێوایە "ئۆباڵی ئەنجام نەدانی دانیشتنی ئەمڕۆی پەرلەمانی کوردستان لە ئەستۆی ئەو پەرلەمانتارانەیە کە خۆیان بە نوێنەری خەڵک دەزانن و بەڵێنیاندابوو ئامادەی دانیشتنەکەی پەرلەمان بن، کەچی ئامادەی دانیشتنەکە نەبوون، بۆیە ئۆباڵەکەی لە دوونیا و لە قیامەت لەسەر شانی ئەوانەیە".
پەرلەمانتارەکەی کۆمەڵی ئیسلامی زیاتر روونیکردەوە "ئەمانە گوناهباردەبن، چونکە عەهد و بەڵێنیا شکاندووە، ئێمەش دڵخۆشین کە لەسەر عەهد و بەڵێنی خۆمان بەردەوام بووین و سووریش دەبین".
هەورامان گەچێنەیی دەڵێت "مسوڵمان دەبێت خاوەن عەهد و بەڵێنی خۆی بێت، هەر کەسێک موسڵمانیش نەبێ مادام عەهد و بەڵێنیداوە لە رووی مرۆڤایەتییەوە دەبێت پێوەوە پابەند بێت".
بڕیار بوو رۆژی چوارشەممە 19-8-2015 پەرلەمانی کوردستان کۆببێتەوە بۆ خوێندنەوە و دەنگدان لەسەر راپۆرتی لیژنەی یاسایی لەسەر هەموارکردنەوەی یاسای سەرۆکایەتی هەرێمی کوردستان بەڵام رێژەی یاسایی پەرلەمانتارانی کوردستان بۆ کۆبوونەوەکە تەواو نەبوو بۆیە کۆبوونەوەکە نەکرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ