هەڵەیەک روویدا! دووبارە هەوڵبدە
ساتی "پەلاماردانی" جووتیارانی کورد لە تۆپزاوا لەلایەن سوپای عێراقەوە.
رووداو دیجیتاڵ
سوپای عێراق دەیەوێت لە نێو زەوییەکی تاپۆی کورد لە تۆپزاوای کەرکووک، رێگایەکی نوێ دروستبکات و خاوەنی زەوییەکانیش رێگرییان لێدەکەن و گرژیی دەکەوێتە نێوانیان.
ئەوەی لە سەرەتای ڤیدیۆکەدا دەردەکەوێت، ساتی هێرشی سەربازانی فیرقەی یازدەی سوپای عێراقە، بۆ سەر چەند ماڵێکی کوردی گوندی تۆپزاوا لە کەرکووک. نزیکەی 100 سەرباز بە دار و قۆناخە تفەنگ لە گەورە و بچووکی ئەو چەند ماڵە دەدەن.
بەرزان نازم دانیشتووی گوندی تۆپزاوایە و دەڵێت، "شووراکەیان کردەوە و گوتیان ئۆتۆمبێلەکانتان لادەن چونکە شۆڤڵ هات و دەبێت رێگاکە بکەیەنەوە، زیاتر لە 100 سەرباز دەبوون و ئەفسەرەکەیان پێیگوتن ئەمانە کوردن و لێیان بدەن، هەموو سەربازەکان هێرشیانکردە سەرمان و بەچەک و دار لێیانداین، ئەوان چەکداربوون و ئێمەش لە نێو حەوشەی ماڵ خۆمان بووین و هیچمان پێنەکرا."
ئەو زەوییەی سوپا دەیەوێت رێگای لەسەر دروستبکات، تاپۆیە و بەناوی کوردێکەوەیە، چەند رۆژێک لەمەوپێش دەستبەسەکرا و دواتر بەکەفالەت ئازاد کرا، ئەو دەڵێت، هەموو ئامانجی سوپا دەستبەسەرداگرتنی زەوییەکانیانە.
نازم مەحمود، خاوەن زەوییەکەیە و دەڵێت، "کاتێک لەگەڵ منداڵەکانم هاتینە ئێرە ئەوان لێرە بوون، قسەمان دەکرد ئاگریان دەکردەوە، لەناکاو 100 سەربازیان هاتن و پاڵیان بە شووراکەوەنا و هێرشیانکردە سەرمان و لێیانداین، من هەموو ئەمانەم بە فەرماندەی فیرقەی یازدە گوت، ئەویش دەڵێت بەبێ ئاگاداریی من بووە."
خاوەن زەوییەکان و نوێنەری خەڵکەکە، چوونەی بارەگای فیرقەی یازدە و بەشێوەیەکی کاتی دروستکردنی رێگاکەیان راگرت و لەوێ سوپا پێی گوتوون دەبێ لە چەند رۆژێکدا رێگایەکیان لەوێ بۆ بکەنەوە.
ساتح ناسح، نوێنەرێ گوندی تۆپزاوا دەڵێت، "رێگایەکی شوێنگرەوەی دیکەیان دەوێت، ئێمە پێمان گوتن ئێوە سێ رێگاتان هەیە و پێویستتان بە رێگای دیکە نییە، بەشێوەیەکی کاتی رێکارەکەیان راگرت، بەڵام بابەتەکە کۆتایی نەهاتووە و لە ماوەیەکی کەمدا جارێکی دیکە دەچینەوە لایان."
بەپێی ئەو ماستەرپلانەی سوپای عێراق لەسەر زەوییەکانی کورد دایناون، دەبێت لە سێ ساڵدا سێ سەربازگە و 380 یەکەی نیشتەجێبوون لە سنوورەکانی تۆپزاوا، یایچی و تەرکەلان دروستبکرێن کە زەوییەکان لەنێو دۆسیەی کێشە لەسەرەکانن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ