رووداو دیجیتاڵ
سەرۆکی دیوانی ئەنجوومەنی وەزیرانی هەرێمی کوردستان، واژۆی لەسەر نووسراوێک کرد کە تایبەتە بە دووسایدکردنی رێگەی نێوان قەزای دەربەندیخان و ناحیەی وارماوا. قایمقامی قەزاکە دەڵێت، کۆماپانیای جێبەجێکار ئامادەیە بۆ دەستبەکاربوون.
نووسراوەکە ژمارە 4459 و واژۆی ئومێد سەباح، سەرۆکی دیوانی ئەنجوومەنی وەزیرانی لەسەرە و تێیدا هاتووە: "لەبەر بەرژەوەندیی گشتی و کەمکردنەوەی رووداوی هاتووچۆ، رەزامەندی بەڕێز جێگری سەرۆکوەزیران وەرگیرا بە دووسایدکردنی رێگەی نێوان (وارماوا {زەڕایەن} - دەربەندیخان) لە چوارچێوەی فەرمانی گۆڕانکاری پڕۆژەی رێگەی کەلار – سلێمانی".
سلێمان محەممەد، قایمقامی قەزای دەربەندیخان، ئەمڕۆ پێنجشەممە بە تۆڕی میدیایی رووداوی گوت: "پرۆژەکە لەسەر بودجەی وەزارەتی ئاوەدانکردنەوە و نیشتەجێکردن جێبەجێ دەکرێت".
لەبارەی کاتی جێبەجێکردنی پڕۆژەکەوە قایمقامی دەربەندیخان گوتی، دوای رێکارە یاسایی و کارگێڕییەکان دەچێتە جێبەجێکردنەوە لەلایەن هەمان ئەو کۆمپانیایەی رێگەی دەربەندیخان بۆ کەلاری بە دووساید کردووە.
رێگەی نێوان دەربەندیخان و ناحیەی زەڕایەن، جگە لە دانیشتووانی هەردوو سنوورەکە، رێگەی سەرەکیی هاتووچۆی دانیشتووانی ئیدارەی سەربەخۆی گەرمیانیشە بۆ سلێمانی و دەوروبەری.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ