کۆمیسیۆن بۆ رووداو: 44 سکاڵا لە رۆژانی بانگەشەدا تۆمار کراون

 

 

عیماد جەمیل، سەرۆکى تیمى رۆژنامەڤانیى کۆمیسیۆنى باڵاى سەربەخۆى هەڵبژاردنەکانى عێراق ئەمڕۆ چوارشەممە بە تۆڕى میدایی رووداوى راگەیاند، "لە رۆژانی بانگەشەى هەڵبژاردندا 44 سکاڵاى لیست و بەربژێرەکان لە کۆمیسیۆن تۆمارکران."

 

عیماد جەمیل گوتی، 9 سکاڵایان رەتکراونەتەوە، 7 دانەیان پەسند کراون و هەڵسەنگاندن بۆ 28 سکاڵاکەی دیکە دەکرێت و لە رۆژانی داهاتوودا بڕیاریان لەبارەوە دەدرێت.

 

بانگەشەى هەڵبژاردنى لیست، هاوپەیمانێتی و بەربژێرەکانى هەڵبژاردنى پەرلەمانى کوردستان 25ى ئەیلوول دەستی پێکرد و 15ى تشرینى یەکەم کاژێر 12:01 خولەک کۆتاییهات. ئەو سکاڵایانە لەو ماوەیەدا تۆمار کراون.

 

سەرۆکى تیمى رۆژنامەڤانیى کۆمیسیۆنى باڵاى سەربەخۆى هەڵبژاردنەکانى عێراق گوتى، "سرووشتی بەشێک لە سکاڵاکان بەو جۆرە بووە کە لایەنى پێشێلکار ئاگادارکراوەتەوە و پێشێلکارییەکانی نەهێشتووە، لەوانە دانانى وێنە لە شوێنى رێگەپێنەدراو و هەڵواسینى وێنە بە دیوارى فەرمانگە حکومییەکانەوە."

 

رێکارەکانى کۆمیسیۆن بەو جۆرە بوون کە هەر لیست و بەربژێرێک پێشێلکارى لە دانانى پۆستەر لە شوێنى رێگەپێنەدراو بکردایە، ئاگادار دەکرایەوە بۆ ئەوەى لە سێ رۆژدا لایبدات.

 

1191 بەربژێر رکابەرى بۆ بەدەستهێنانى 100 کورسی پەرلەمانى کوردستان دەکەن.

 

دەنگدانی تایبەتی رۆژی 18ی مانگ و دەنگدانی گشتیش رۆژی 20ى مانگ دەکرێت.