کەشناسی: سبەی لە چەند ناوچەیەکی هەرێمی کوردستان نمەباران دەبارێت

 

بە گوێرەی راگەیێندراوی ئەمڕۆی کەشناسیی هەرێمی کوردستان، پێشبینی دەکرێت سبەی پێنجشەممە لە ناوچە شاخاوییەکانی پارێزگای هەولێر و بەشێک لە ئیدارەی راپەرین نمەباران ببارێت و هەورە تریشقەی پچر پچر هەبێت لەنێوان کاتەکانی بەیانی تاوەکو ئێوارە.

 

رۆژی چوارشەممە 16ی تشرینی یەکەمی 2024، محەممەد کەمال، شارەزای کەشناسی بە تۆڕی میدیایی رووداوی راگەیاند: "سبەی سەرلەبەیانی بارانبارین لە ناوچە شاخاوییەکانی دهۆک، پارێزگای هەولێر و ئیدارەی سەربەخۆی سۆران بە شێوەی پچڕ پچڕ باران دەبارێت و بارانەکە هەورە برووسکەشی لەگەڵە."

 

ئەو کەشناسە گوتی، "سبەی لە دوای نیوەڕۆوە شەپۆلی بارانبارین سەنتەر شارەکانی هەولێر، سۆران، چۆمان و شێلادزی و ئاکرێ دەگرێتەوە و تاوەکو شەو بەردەوام دەبێت.". گوتیشی: "شەپۆلەکە تاوەکو 19ی تشرینی یەکەم بەردەوام دەبێت."

 

محەممەد کەمال پێشبینی دەکات، رۆژی هەیینی بارستە هەوایەکی سارد هەرێمی کوردستان بگرێتەوە و "بەراورد بە ئەمڕۆ، پلەی گەرما 8 پلە دابەزێت."

 

 

هەولێر: 33  پلەى سیلیزى

سلێمانی: 32 پلەى سیلیزى

دهۆک: 31 پلەى سیلیزى

کەرکووک: 35 پلەى سیلیزى

هەڵەبجە: 33 پلەى سیلیزى

زاخۆ: 30  پلەى سیلیزى

حاجی ئۆمەران: 20  پلەى سیلیزى

سۆران:  31  پلەى سیلیزى

گەرمیان: 36  پلەى سیلیزى