هەڵەیەک روویدا! دووبارە هەوڵبدە
رووداو دیجیتاڵ
یەکێتیی نیشتمانیی کوردستان، پارتى دیموکراتی کوردستان، رێکخراوى بەدر، حیزبی شیوعیی کوردستان و حیزبی سۆسیالیست دیموکراتی کوردستان، لە خانەقین دژى بە قەزاکردنى هەردوو ناحیەى گوڵاڵە و قەرەتەپە دەوەستنەوە و بە بچووککردنەوەى سنوورى خانەقین و هۆکارێک بۆ زیادبوونى ناکۆکیى سیاسی و دابەشبوونى پێکھاتەکانى دادەنێن.
رۆژی پێنجشەممە، 16ى کانوونى دووەمى 2025، نوێنەرانى ئەو پێنج لایەنە لە خانەقین کۆبوونەوە و راگەیێندراوێکى هاوبەشیان لە دژى ئەو هەنگاوەى ئەنجوومەنى پارێزگاى دیالە دەرکرد.
لە راگەیێنراوەکەدا هاتووە، نیگەرانن لەو گۆاڕانکارییە سیاسی و کارگێڕییانەى لە دیالە و خانەقین دروست بوون و هەوڵى بەردەوام هەن بۆ گۆڕین و بچووککردنەوەى سنوورى کارگێڕى خانەقین و پەراوێزخستنى رۆڵە مێژوویی و سیاسی و جوگرافییەکەى.
ئەو کاردانەوەیەى پێنج لایەنەکە دواى ئەوە بوو کە لە 31ى کانوونى یەکەمى 2024، ئەنجوومەنى پارێزگاى دیالە بە دەنگدان ناحیەکانى جەلەولا و قەرەتەپەى کردە قەزا کە پێشتر سەر بە قەزاى خانەقین بوون.
ئەمیر خانەقینى، نوێنەرى حیزبى شیوعیى کوردستان لەو کۆبوونەوەیە بە تۆڕى میدیایی رووداوى راگەیاند: ئەوە یەکەمجار بوو دواى رووداوەکانى 16ى ئۆکتۆبەرى 2017 ئەو لایەنانە لە خانەقین کۆببنەوە و راگەیێنراوى هاوبەش دەربکەن. "کۆبوونەوەکانیان بەردەوام دەبن و هەڵوێستی دیکەیان دەبێت کە رەنگە خۆپێشناندان یان پێکهێنانى لیژنە بێت بۆ رۆیشتن بۆ بەغدا."
لە راگەیێندراوەکەدا هاتووە، قەزاى خانەقین لە سنوورى مادەى 140 دایە و پێویستە هەموو گۆاڕانکارییە کارگێڕییەکان تێیدا بە گوێرەى دەستوور و یاسا بەرکارەکان بکرێت و ئەو گۆاڕانکارییە کارگێڕییانەى کراون "بێ پاساوى بابەتین و دەبێتە هۆى دابەشبوونى نێوان پێکهاتەکان و ئاڵۆزیى سیاسی و کۆمەڵایەتى زیاد دەکات و هانى ناکۆکى نێوان پێکهاتەکانى دەدات".
ئەمیر خانەقینى گوتیشى: "بڕیارە ئەو هەڵوێستەیان بە فەرمى لە رێگەى قایمقامى خانەقینەوە ئاڕاستەى پازێزگارى دیالە بکرێت. ترسێکى دیکە ئەوەیە کە هەوڵ هەیە 27 گوند لە سنوورى خانەقین داببڕێنرێن و بکرێنە ناحیە و بخرێنە سەر گوڵاڵە".
ئەو پێنج لایەنە داوایان لە ئەنجوومەنى پارێزگا و حکومەتى خۆجێیی دیالە و حکومەتى فیدراڵى کردووە لەو بڕیارانە پاشگەز ببنەوە کە "دەبنە هۆى دابەشکردن خانەقین و کەمکردنەوەى رۆڵى لە رووی کارگێڕییەوە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ