رووداو دجیتاڵ
سەرۆکی شارەوانیی هەڵەبجە رایدەگەیێنێت، ساڵی 2024 بەبەهای نزیکەی چوار ملیار دینار پڕۆژەی خزمەتگوزاری تەواوکراون و چەندین پڕۆژەی دیکەیان لە قۆناخی جێبەجێکردندان، دەشڵێت، سێ پڕۆژەی پترۆدۆلار وەگەڕخراونەتەوە، کە بەهاکەیان 16 ملیۆن دۆلارە.
ئەندازیار سەلام بیلال، سەرۆکی شارەوانیی هەڵەبجە لە پۆدکاستی مژاری رادیۆی رووداو باسی پڕۆژە خزمەتگوزارییەکان و گرفتەکانی سنووری هەڵەبجەیان کرد و گوتی، ساڵی 2024 بۆ هەڵەبجە ساڵی پڕۆژەکان بووە، ئەگەر ئەم ساڵیش بەم شێوازە بتوانن بەردەوام بن دەبێتە ساڵی زێڕینی پڕۆژەکانیان.
سەلام بیلال گوتی: "ئەو پرۆژانەی پار جێبەجێکران دوو بەشبوون، بەشێکیان کۆن بوون و لەو ساڵەدا تەواو کراون، کە تێچووەکەیان دوو ملیار و 700 ملیۆن دینار بوو وەکو؛ رێگەسازی نەخۆشخانەی منداڵان تاوەکو پزیشکی دادی هەڵەبجە و نۆژەنکردنەوەی شەقامی پەروەردە تاوەکو قوتابخانەی باڵامبۆ.
سەبارەت بە بەشی دووەمی پڕۆژەکان، سەلام بیلال گوتی، چەند پڕۆژەیەکی خزمەتگوزاری بوون و لەساڵی 2024دا جێبەجێکراون و تەواو بوون، بەهاکەیان 830 ملیۆن دینار بوو، وەکو؛ دروستکردنی ئاوەڕۆی کۆڵانەکان، رێگەسازی گەڕەکی ئەندازیاران، پڕۆژەی باراناو و ئاوەڕۆ لەگەڵ تێکەڵەرێژ و دروستکردنی باخچەیەک بە گوژمەی 330 ملیۆن دینار لەسەر داهاتی شارەوانی.
سەرۆکی شارەوانیی هەڵەبجە ئاماژەی بەوەشکرد، بەگوژمەی نزیکەی 500 ملیۆن دینار کاری قیرتاوکردنی شەقامەکانی ناوشار و سەوزکردنی دوورگەی نێوەڕاستی شەقامەکانیان لەسەر بودجەی تایبەت جێبەجێ کردووە.
لەدوای سەرهەڵدانی قەیرانی دارایی و شەڕی داعش ئەو پرۆژانەی لەسەر ئاستی پارێزگا و ئیدارەکان هەبوون و لەسەر بودجەی پەرەپێدانی ناوچە جیاجیاکانی هەرێمی کوردستان بوو کە بە پترۆدۆلار ناسراون، گرفتی داراییان بۆ دروستبوو و راگیران.
سەرۆکی شارەوانیی هەڵەبجە گوتی، چوار پڕۆژەمان هەن پڕۆژەی خزمەتگوزارین لەسەر بودجەی پترۆدۆلار و بەهاکەیان زیاتر لە 16 ملیۆن دۆلارە، ئێستا گواستراونەتەوە سەر وەبەرهێنانی شارەوانی و دەستیانپێکردووەتەوە، لەوانە؛ خزمەتگوزاری گەڕەکی سەراو، بەشێک لە گەڕەکی شەهیدان، دروستکردنی ئاوەڕۆی سندووقی بۆ ناو هەڵەبجەی شەهید، تەواوکاری خزمەتگوزاری گەڕەکی زەمەقی و گەڕەکێکی دیکەی شارەکە، لەگەڵ گەیاندنی خزمەتگوزاری بە 361 خانووی واریسی شەهیدان بە گوژمەی هەشت ملیار دینار، کە 80٪ـی تەواو کراوە.
لەبارەی ئەو پرۆژانەی کە ساڵی 2024 بەردی بناخەیان دانراوە و لەقۆناخی جێبەجێکردنن، سەلام بیلال گوتی، سێ پڕۆژەی دیکەیان هەن کە لەسەر بودجەی ئاسایی شارەوانین و ئێستا لە قۆناجی جێبەجێکردندان بە گوژمەی ملیارێک و 300 ملیۆن دینارە، وەکو؛ رێگەسازی گەڕەکی سەرا، گەڕەکی ئیمام عەلی و گەڕەکی بامۆک. گوتیشی، رێگەسازی گەڕەکی مامۆستایان بە گوژمەی 436 ملیۆن دینار داهاتی فرۆشتنی زەوی و نۆژەنکردنەوەی شەقامی گشتیی مامۆستای نەناسراو بە گوژمەی 91 ملیۆن دینار لە جێبەجێکردندان.
لەبارەی پلانیان بۆ ساڵی 2025، سەلام بیلال: "ئێستا چوار پڕۆژەی خزمەتگوزاریمان هەن، کە بایی 4 ملیار و 700 ملیۆن دینارە و لە قۆناخی تەندرەدایە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ