هەڵەیەک روویدا! دووبارە هەوڵبدە
ساتی پێشوازیی لە مەسرور بارزانی لەلایەن جووتیاران و پێشمەرگەوە
رووداو دیجیتاڵ
نوێنەری جووتیارانی کورد لە ناوچەی سەرگەڕان رایگەیاند، ئەمڕۆ دووشەممە لە کاتی پێشوازیکردنیان لە مەسرور بارزانی لە سنووری کەرکووک، کۆمەڵێک داواکارییان پێشکێش کرد، ئەویش داوکارییەکانی لێ وەرگرتوون و پشتگیری لێکردوون.
لە 10ـمین رۆژی مانگی رەمەزان مەسرور بارزانی، سەرۆكوەزیرانی هەرێمی کوردستان، سەردانی میحوەری رۆژئاوای كەركووكی کرد و لەگەڵ جووتیارانی کورد و هێزەكانی پێشمەرگە بەیەكەوە بەربانگیان كرد.
محەممەد ئەمین، نوێنەری جووتیارانی کورکووک، بە تۆڕی میدیایی رووداوی راگەیاند، "کۆمەڵێک داواکاریمان هەبوو، کە تایبەت بوون بە جووتیاران و کوردی ناوچەکە، یەکێک لەوانە ئەوەبوو کە هەوڵی جێبەجێکردنی مادەی 140 بدرێ و بکرێتە کاری لە پێشینەی حکومەت، چونکە حکومەتی هەرێمی کوردستان خاوەنی یەکەمی ناوچە دابڕاوەکانە."
ئەو نوێنەری جووتیاران دەڵێت، "کاک مەسرور داوکارییەکانی وەرگرتین و پشتگیری لێکردن، ئێمەش چاوەڕێ هەوڵ و کارەکانیان دەبین، چونکە ئەمە کارێک نییە کە راستەوخۆ جێبەجێ بکرێت، بەڵکو دەبێت لەگەڵ سەرۆکوەزیرانی عێراق کۆببنەوە و گفتوگۆ بکەن بۆ جێبەجێکردنی داواکارییەکانمان."
محەممەد ئەمین، کە لە کاتی گرژییەکەی 17ـی شوباتدا لە نێوان جووتیارانی سەرگەڕان و سەربازانی سوپای عێراق، بە ملپێچەکەی لەلایەن سەربازێکی عێراقییەوە لەسەر تراکتۆرەکەی راکێشرا و زۆرترین کاردانەوەی هەبوو، ئاماژەی بەوەدا، "لە دوای 16ـی ئۆکتۆبەرەوە 7 ماڵی عەرەب لەناو گوندی پەلکانە نیشتەجێکراون کە شەمەرین." گوتیشی: "داوامان لە کاک مەسرور کرد کە پێگەی خۆی بەکاربهێنێت، چونکە پەیوەندییەکی باشیان لەگەڵ سەرۆک عەشیرەتەکان هەیە تاوەکو ئەو خێزانانە لەوێ نەمێنن، چونکە تا ئەوان لەوێ بن کێشە و ناکۆکی بەردەوام دەبێت."
17ـی شوباتی 2025 لەکاتی هەوڵدان بۆ کێڵانی زەوییەکانیان، جووتیارانی سەرگەڕان لەلایەن سوپای عێراقەوە ئاستەنگیان بۆ دروستکرا و گرژی دروستبوو. دوای ئەوە، محەممەد شیاع سوودانی، سەرۆکوەزیرانی عێراق لیژنەیەکی بۆ لێکۆڵینەوە ناردە کەرکووک و لەگەڵ نوێنەری جووتیاران کۆبووەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ