رووداو دیجیتاڵ
لە قەزای خەباتی سەر بە پارێزگای هەولێر، چەند بازگەیەک بۆ دەستبەسەرداگرتنی چەکی بێمۆڵەت دانراون و پارێزگاری هەولێریش دەڵێت، "لە هەر شوێنێک دیاردەی چەکداری زیاتر بێت، هەڵمەتەکە تووندتر دەبێت."
رۆژی یەکشەممە 09-04-2023 ئومێد خۆشناو، پارێزگاری هەولێر بە تۆڕی میدیایی رووداوی راگەیاند، لە چوارچێوەی پلانەکانی حکومەتی هەرێمی کوردستان بۆ دەستبەسەرداگرتنی چەکی بێمۆڵەت، چەند بازگەیەک لەنێو شارۆچکەی خەبات و دەوروبەری دانراون.
ئومێد خۆشناو گوتیشی، "هەر کەسێک چەکی بێمۆڵەتی پێبێت، دەستی بەسەردا دەگیرێت و لە هەر شوێنێکیش دیاردەی چەکداری زیاتر بێت، هەڵمەتەکە تووندتر دەبێت."
بەراورد بە شارۆچکەکانی دیکەی هەرێمی کوردستان، قەزای خەبات زۆرترین شەڕ تێیدا روودەدات کە زۆربەیان چەکیان تێدا بەکاردێت و لەسەر کێشەی کۆمەڵایەتی و زەویوزارن.
ئێوارەی هەینی، 7ی نیسانی 2023، لەنێو قەزای خەبات شەڕە تەقە لەنێوان چەند کەسێکدا روویدا. لەوبارەیەوە کوێستان ئەحمەد، قایمقامی خەبات بە تۆڕی میدیایی رووداوی گوت، کێشە لەنێوان دوو خێزاندا بووە و شەڕ دروستبووە و بەهۆیەوە کەسێک کوژراوە.
بەگوێرەی پۆلیسی هەرێمی کوردستان، ساڵی رابردوو 455 رووداوی کوشتنی ئەنقەست، بە هەڵە و خۆکوشتن لە هەرێمی کوردستان تۆمارکراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ