وێنە.. رێوڕەسمی پێشاندانی بەڵگەفیلمێکی رووداو...

گالەری

وێنە.. رێوڕەسمی پێشاندانی بەڵگەفیلمێکی رووداو لەبارەی ئەبوبەکر ئەفەندیی خۆشناو

07-11-2023

24 Photos

بڵند تاهیر @Bilindtahir

رووداو دیجیتاڵ

رۆژی سێشەممە، 7-11-2023 تۆڕی میدیایی رووداو بەڵگەفیلم و کتێبی "ئەستێرەی کوردستان [ـی] بە ئاسمانی کەیپ تاونەوە" بڵاوکردەوە. کتێبەکە لە 190 لاپەڕە پێکهاتووە و بە وردی باسی ئەبوبەکری کوردی و خۆشناوەکانی ئەفریقا دەکات و چەند بەڵگەنامەیەکیش لەبارەیانەوە لەخۆ دەگرێت.

بەڕێوەبەری گشتیی تۆڕی میدیایی رووداو لە رێوڕەسمی نیشاندانی بەڵگەفیلمەکەدا رایگەیاند، کارەکانی مەلا ئەبوبەکر ئەفەندی، "شایەتییەکی دیکەیە بۆ زانایی مەلاکانی کوردستان و بۆ بیری راستەقینە و رەسەنی کورد و مەلاکانی کوردستان کە هەستی زانست پەروەری و بیری بڵاوکردنەوەی خوێندەواری و پێکەوەژیانی ئاشتییانە بووە."

ئاکۆ محەممەد، بەڕێوەبەری گشتیی تۆڕی میدیایی رووداو گوتی، "زۆر دڵخۆشین کە ئەمڕۆ هەموومان لێرە لە هەولێر لە دەوری چرای مەلا ئەبوبەکری خۆشناو کۆبووینەتەوە. لە سەرەتای دروستبوونی رووداو دا دروشمێکمان دانا بۆ 16 بەڵگەفیلم لەسەر کوردانی کۆمارەکانی پێشووی یەکێتیی سۆڤیەت ئەویش ئەوە بوو: (کورد لە هەر شوێنێک بن دەیاندۆزینەوە). ئەو کارە بەشێکە لە بەڵێنەکەمان."

ئەبوبەکر ئەفەندی خۆشناو، خەڵکی گوندی سیساوەی سەر بە قەزای هەریرە، 18 ساڵی کۆتایی تەمەنی لە شاری کەیپ تاونی ئەفریقای باشوور بەسەر بردووە، هەر لەوێش کۆچی دوایی کردووە، ئێستا زیاتر لە 2000 نەوەی ئەبوبەکر ئەفەندی خۆشناو لە شاری کەیپ تاون ماون و بە خۆشناوەکانی ئەفریقا ناودەبرێن. یەکێک لە نەوەکانی ئەو زانا کوردە دەڵێت، "ئەبوبەکر ئەفەندی خۆشناو لەگەڵ چوونی بۆ کەیپ تاون، توانیویەتی رۆڵێکی گرنگ لە پرۆسەی خوێندەواری و زانستدا بگێڕێت و لەو ماوەیەدا هەشت کتێبی ئایینیی نووسیوە و مێدالیای سوڵتان عەبدولعەزیزی بەدەستهێناوە."

بەڵگەفیلم و کتێبەکەی رووداو لەلایەن سیروان رەحیم، کاری دەرهێنان و نووسینیان بۆ کراوە.