هەڵەیەک روویدا! دووبارە هەوڵبدە
دیمەنێکی ئاگرکەوتنەوە لە پاڵاوگەکە
رووداو دیجیتاڵ
ئاگر لە پاڵاوگەیەکی سووتەمەنی لە سنووری گوێڕ کەوتەوە، تیمەکانی بەرگریی شارستانیی هەولێر زوو بە فریای کەوتن. ئاگرەکە لەنێو خەزانەی سووتەمەنیدا بوو و دوای چەند کاژێرێک، تیمەکان ئاگرەکەیان کۆنترۆڵکرد.
ئاگرەکە لە ماددەی فلۆینی پاڵاوگەکە کەوتبووەوە و بە چرکەساتێک 300 مەتر دووجای داگرتووە، لەوکاتەدا ژمارەیەک کرێکار سەرقاڵی کار بوون و بەهۆیەوە چوار کرێکار بەشێکی زۆری جەستەیان سووتاوە.
کاروان عەلی، گوتەبێژی بەرگریی شارستانیی هەولێر لە شوێنی ئاگرەکە بە رووداوی گوت، ئاگرەکە لە کاتی پاککردنەوەی تەنکەرەکانی فلۆین کەوتووەتەوە، ماددەکە هەستیارە و دیارە گوشاری کەوتووەتە سەر بەهۆی کرداری لێخشانەوە.
تاوەکو ئێستا هۆکاری سەرەکیی ئاگرکەوتنەوەکە نازاندرێت و بڕیارە بەرگریی شارستانی بەم نزیکانە هۆکارەکەی بڵاوبکاتەوە.
بریندارەکان گەیێندرانە نەخۆشخانەی ئیمێرجنسیی هەولێر، رێژەی سووتانی یەکێکیان 100% و دووانیان 98%ـە، یەکێکیشیان 25%ـە.
مەغدید عوبێد، خاوەنی پاڵاوگەکە بە رووداوی راگەیاند، "کاتێک هێنامانن بۆ نەخۆشخانە هەموو گیانیان رەش بوو، بارودۆخیان باش نەبوو، بەڵام کە پاککرانەوە و چارەسەری تەندروستییان بۆ کرا، باش بوون. ئێستا قسە دەکەن و ئاگایان لە خۆیانە".
بەپێی زانیارییەکانی بەرگریی شارستانی، ئەو کرێکارانەی سووتاون، دووانیان خەڵکی دهۆکن و ناویان ئیسماعیل ئەحمەد عەلی و مەهدی ئەحمەد عەلییە. هاوکات دووانی دیکەش لە نەتەوەی عەرەبن و خەڵکی موسڵن، ناویان مستەفا سەعدی و رەعد ئەحمەد یونسـە.
پزیشکانی نەخۆشخانەکە بە رووداویان گوت، راستە رێژەی سووتاویی کرێکارەکان زۆرە، بەڵام چارەسەری پێویستی تەندروستی بۆ بریندارەکان کراوە و "مەترسیی گیانلەدەستدانیان نییە. چونکە قووڵیی سووتاوییەکە کەمە و پلەی یەکە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ