رووداو دیجیتاڵ
بەڕێوەبەری گشتیی رێگەوبان و ئاوەدانکردنەوەی ئیدارەی راپەڕین رایدەگەیێنێت، لە ماوەی پێنج مانگی رابردوودا بە بەهای زیاتر لە دوو ملیار و 500 ملیۆن دینار، پرۆژەی رێگەوبانیان لە سنوورەکە جێبەجێکردە. دەشڵێت، نەبوونی نەختینە گرفتی بۆ کارەکانی پرۆژەی رێگەی شکارتە -بالیسان دروستکردووە.
ئەندازیار ئومێد حەمەعەلی، بەڕێوەبەری گشتیی رێگەوبان و ئاوەدانکردنەوە و نیشتەجێکردنی ئیدارەی راپەڕین میوانی پۆدکاستی مژاری رادیۆی رووداو بوو، باسی کار و پرۆژەکانی رێگەوبانی سنوورەکەی کرد و گوتی "لەماوەی پێنج مانگی رابردوودا، بەردی بناخەی پێنج پرۆژەی گرنگ بە گوژمەی دوو ملیار و 500 ملیۆن دینار دانراون، کە لە قۆناخی جێبەجێکردندان و قیرکردنی بەشێکیان دەستی پێکردووە."
بەرێوەبەری گشتیی رێگەوبانی راپەڕین ئەوەشی خستەڕوو، ئەو پرۆژانەی جێبەجێ دەکرێن، ''رێگەی گرنگ و ستراتیژین بۆ سنوورەکە''، لەوانە؛ ''رێگەی قەڵادزێ-دارەشمانە کە کۆتایی هەفتەی رابردوو قیرکردنی دەستیپێکرد و ئێستا لە قۆناخی کۆتاییدایە، پرۆژەی تێکەڵەڕێژکردنی رێگەی 17 گوندی بناری مەنگوڕایەتی و قیرکردنی رێگەی گوندەکانی بناری قەندیل لەگەڵ قیرکردنی رێگەی شەش گوندی سنوورەکە، گوندەکانی؛ بۆڵێ، لێوژێ، ئێنزێ، چیوەی سەروو و چیوەی خواروو."
ئومێد حەمەعەلی ئاماژەی بەوە کرد، هەفتەی رابردوو بەردی بناخەی پرۆژەی قیرکردنی رێگەی سێ گوندی بەری مەرگە (هەڵۆنە، نۆڵچکە و لۆتەر) دانراوە و خراوەتە بواری جێبەجێکردنەوە.
رێگەی بالیسان-شکارتە، درێژییەکەی 23 کیلۆمەترە و یەکێکە لە رێگە گرنگ و ستراتیژییەکانی نێوان ئیدارەی راپەڕین و پارێزگای هەولێر، بەڵام ئەویش بەدەر نییە لە کاریگەرییەکانی قەیرانی دارایی و گرفتی نەبوونی نەختینە.
بەڕێوەبەری گشتیی رێگەوبانی ئیدارەی راپەڕین دەڵێت، "رێگەی بالیسان-شکارتە، زیاتر لە 60٪ تەواوکراوە، بەڵام گرفتی نەختینەی هەیە و وەکو پێویست نەتوانراوە کاری لەسەر بکرێت کە گوژمەی پرۆژەکە 7.7 ملیار دینارە، کۆمپانیای جێبەجێکار، بەشی زۆری پێشینەکانی وەرنەگرتووە و ئەوەش گرفتی بۆ پرۆژەکە دروستکردووە."
دروستکردن و چاکسازی لە پرۆژەکانی سێکتەری رێگەوبان لەسەر سێ جۆر بودجەن؛ بودجەی وەبەرهێنانی وەزارەت، بودجەی ئاسایی کە کەمترە لە 500 ملیۆن دینار و بەشێک لە داهاتی وێستگەکانی کێش.
ئومێد حەمەعەلی دەڵێت، یەکێکی دیکە لەو رێگەیانەی هێشتا تەواو نەکراوە، رێگەی چوارقوڕنە-هیزۆپە، تائێستا کاری هێڵکاری و گادڕێلی و جۆینتی پردەکانی بۆ دانەنراوە، کە نزیکەی 3 ملیار دیناری پێویستە. سەرپەرشتیاری ئیدارەری راپەڕین بەڵێنیداوە بودجەی بۆ دابین بکات.
لە دوو ساڵی رابردوودا 29 پرۆژەی سێکتەری رێگەوبان لە سنووری ئیدارەی راپەڕین رەزامەندی و تەرخانی داراییان هەبوو، بەڵام بەهۆی نەبوونی نەختینە، کاریان تێدا نەکرابوو.
بەڕێوەبەری رێگەوبانی راپەڕین بە پۆدکاستی مژاری راگەیاند، لەکۆی 29 پرۆژە کە دوو ساڵ پێشتر رەزامەندیی داراییان هەبووە و کاریان تێدا نەکرابوو، ئێستا 9 پرۆژەیان تەواوکراون. 10 پرۆژەش کاریان تێدا دەکرێت، بەڵام 10 پرۆژەیان هیچ کاری تێدا نەکراوە، ئەوەش بەهۆی نەبوونی نەختینەوەیە.
بەگوتەی ئومێد حەمەعەلی، پرۆژەی دروستکردنی مۆنیومێنتی شەهیدان لە قۆناخی تەندەر دایە و بەگوژمەی 9 ملیار دینار لە دەڤەری راپەڕین جێبەجێ دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ