رووداو دیجیتاڵ
بەڕێوەبەرایەتیی بەرگریی شارستانیی راپەڕین رایگەیاند دوانیوەڕۆی ئەمڕۆ گەنجێک کە دانیشتووی رانیەیە، لە هەمان ئەو شوێنەدا خنکا، کە چەند رۆژێک لەمەوبەر گەنجێکی دیکە لەکاتی مەلەکردندا لێی خنکابوو.
لە بەشێکی راگەیەندراوەکەدا بەڕێوەبەرایەتیی بەرگریی شارستانیی راپەڕین دەڵێ "بەداخەوە ئێستا (کاژێر 06:30ـی ئێوارە) گەنجێک لە زێی بچووک خنکا. تیمەکانی غەواسی بەڕێوەبەرایەتیمان سەرقاڵی گەڕانن بەدوای تەرمەکەیدا."
ئەو گەنجە ناوی محەممەد عەلی ـیە، تەمەنی 20 ساڵە و دانیشتووی گەڕەکی قولەی رانیە بووە، بەمەبەستی مەلەکردن چووەتە نێو ئاوی دەربەندی رانیە و لەئەنجامدا خنکاوە.
بەپێی بەڕێوەبەرایەتیی بەرگریی شارستانیی رانیە، ئەو گەنجە "لە هەمان ئەو شوێنەدا خنکاوە، کە چەند رۆژێک پێش ئێستا کەسێکی دیکە تێیدا خنکا".
ئەو رووداوی خنکانەی بەڕێوەبەرایەتییەکە باسی دەکات، لە رۆژی 1ـی ئەم مانگە لە دەربەندی رانیە روویدا، کاتێک هاونیشتمانییەکی دانیشتووی هەولێر کە بە سەردان چووبووە دەڤەری راپەڕین، لەکاتی مەلەکردندا لەنێو دەربەندی رانیە خنکا و، رۆژی هەینی تەرمەکەی لەلایەن تیمەکانی بەرگریی شارستانییەوە دۆزرایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ