کێڵگەیەکی پەلەوەری لە پشدەر. وێنە: رووداو
رووداو دیجیتاڵ
ئەوەی لە سەرەتای ڤیدیۆیەکەدا دەردەکەوێت كێڵگەیەكی پەلەوەرە لە قەزای پشدەر، بەهۆی بڵاوبوونەوەی نەخۆشی لەنێویاندا مریشکەکان هیلاك و لەپێ كەوتوون، ژمارەیەکی زۆریشیان مرداربوون.
بەرهەم قادر خاوەنی سێ كێڵگەی پەلەوەرە لەکۆی 53 هەزار مریشک، کەمتر لە 20 هەزاریان بەسەلامەت دەرچوون، بایی نزیكەی 80 ملیۆن دینار زەرەرمەند بووە.
بەرهەم قادر دەڵێت: ''هەموو كێڵگە پەلەوەرییەكان وێران بوون، هەر هەموومان زەرەرمەندبووین. هەیە 70٪ـی مریشكەكانی مرداربوون، ئەگەر كوالێتیی جووچكەكان باشبێت، دەكرێ لە تەمەنی دوو رۆژییەوە نەخۆشبن؟ دەكرێ ڤاكسینێك نەبێ وەڵامدەرەوەی نەخۆشییەكە بێت؟''
نەخۆشییەکە تاوەکو ئێستا تەنیا کێڵگە پەلەوەرییەکانی راپەڕینی گرتووەتەوە؛ ڤێتێرنەری دەڵێت، نەخۆشیی نیوكاسڵە، هۆكاری بەكۆمەڵ مرداربوونی مریشكەكان بۆ بەکارنەهێنانی ڤاكسین لەکاتی خۆیدا و خراپیی سیستمی گەرمی و ساردی هۆڵی كێڵگە پەلەوەرییەكان دەگێڕێنەوە.
سەعدی تەیب، بەڕێوەبەری ڤێتێرنەریی راپەڕین دەڵێت: ''بەداخەوە كێڵگە پەلەوەرییەكانی راپەڕین وەك پێویست لەژێر چاودێریی ڤێتێرنەری دا نین، زۆر پابەندنین بە رێنماییەكانمان لە جووچك داخڵكردن و لە فرۆشتن دا پرس و راوێژ بە ئێمە ناكەن، ئەمەش كارێكی ناتەندروستە.''
لە راپەڕین 176 كێڵگەی پەلەوەر لە وەزارەتی كشتوكاڵ مۆڵەتیان پێدراوە، بەرهەمی گۆشتیان ساڵانە زیاترە لە 14 هەزار تۆن. نەخۆشییەكەش لەنێو زۆربەیاندا بڵاوبووەتەوە.
نزیکەی مانگێکە نەخۆشییەکە لەنێو کێڵگە پەلەوەرییەکانی راپەڕین بڵاوبووەتەوە، خواربوونی ملی جووچکە و مریشکەکان و هەوکردنی لووت و تای بەرز لە دیارترین نیشانەکانی نەخۆشییەکەن، ئەوەی گرتی چاك نابێتەوە.
"بەشێکی خاوەن کێڵگەکان بوونەتە دەرمانفرۆش"
پرسی مرداربوونەوەی مریشک و جووجکەی بەشێکی کێڵگە پەلەوەرییەکانی رانیە مژاری گەرمی بەرنامەی بەرپرسیار بوو.
دکتۆر سەعدی تەیب، بەڕێوەبەری ڤێتێرنەریی راپەڕین، لە بەرپرسیار گوتی: "پێنج هۆبەی ڤێتێرنەریی لە سنوورەکەمان هەن، هیچ خاوەن کێڵگەیەک ئێمەی ئاگادارنەکردووەتەوە. کە من لە راگەیاندن بابەتەکە بزانم چۆن بتوانم لیژنە پێکبهێنم."
دڵشاد مستەفا، بەڕێوەبەری ڤێتێرنەریی راپەڕین دەڵێ، بەهۆی "نەبوونی توانا و ئامێر" ناچینە ڤێتێرنەری و دەچینە کلینیکەکانی ڤێتێرنەری. بەڕێوەبەری ڤێتێرنەریی راپەڕین رەتیدەکاتەوە کاریان تەنیا پێدانی دەرمان بێ: "دەبێ بزانین کێڵگەکان دەرمانەکانیان لە کوێ دەستدەخەن. ڤاکسین هەیە بە قاچاخ دێتە هەرێمی کوردستان. بەشێکی خاوەن کێڵگەکان بوونەتە دەرمانفرۆش. دەرمانمان گرتووە بە رەچەتەی خاوەن کێڵگە فرۆشراوە."
بە گوتەی بەڕێوەبەری ڤێتێرنەریی راپەڕین، ئۆتۆمبێل نییە تاوەکو تیم بچن سەردانی کێڵگەکان بکەن. دکتۆر سەعدی تەیب، دەڵێ، هەر خاوەن کێڵگەیەک پەیوەندی بکات دەبێ داوای ئۆتۆمبێل بکەین بێت بە شوێنمان، یان بە ئۆتۆمبێلی تایبەتیی فەرمانبەر دەبێ تیم بڕۆن.
بەشێکی ئەو هێلکانەی لە هەڵهێنەرەکانەوە دەترووکێن بە "قاچاخ" دەهێنرێنە هەرێمی کوردستان. جەمال حوسێن، بەڕێوەبەری سامانی ئاژەڵ لە بەڕێوەبەرایەتیی گشتیی کشتوکاڵی سلێمانی، لە بەرپرسیار، گوتی: "سەرچاوە و کوالێتیی هێلکە کاریگەریی زۆرە لەسەر جووجکەکان و بەشێکیان بازرگانی عەرەب دەیهێنێننە هەرێمی کوردستان. دوای 2014 پشێوی لە فەرمانگەکانی کشتوکاڵ دروستبووە."
هێلکەی ترووکاندنی پڕۆژەکانی هەڵهێنەر، جگە لە بەرهەمی نێوخۆ بەشێکیان لە ئەوروپا، تورکیا و رێگەی قاچاخ"ـەوە هاوردەی هەرێمی کوردستان دەکرێن. لە سنووری سلێمانی، ئەمساڵ هیچ خاوەن هەڵهێنەرێک "بەفەرمی داوای لە کشتوکاڵی سلێمانی نەکردووە" بۆ هاوردەکردنی هێلکە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ