رووداو
رووداو- رووسیا تودەی
رووسیا یەکێک لەو وڵاتانەیە، کە جێ پەنجەی لە بواری بەرهەمهێنانی زنجیرە و فیلمی ئەنیمەشندا بەرچاوە، یەکێک لە دیارترین بەرهەمەکانی کە لەم چەند ساڵی دواییدا بەرهەمیهێناوە، زنجیرەی ئەنیمەیشنی "ماشا و ورچ"ـە.
ئەم بەرهەمە تەلەڤزیۆنییە یەکەم وەرزی کە لە پێنج ئەڵقە پێکهاتبوو، لە ساڵی 2009ـدا لە رووسیا نمایشکرا و هەرساڵەوە ژمارەیەک ئەڵقەی نوێی بەرهەمدێت.
چیرۆکی ئەم بەرهەمە تەلەڤزیۆنییە باس لە کچێکی بچووک بەناوی ماشا و ورچێک دەکات، رووداوەکانی سەرنجراکیش و کۆمێدن، جگە لەو دوو کەسایەتییە، چەندین کەسایەتی دیکەی لاوەکی دەردەکەون، کە تێکڕایان ئاژەڵن.
زنجیرەی "ماشا و ورچ" سەرەتا لە رووسیا نمایشدەکرا، بەڵام ئێستا لە تەواوی جیهان نمایشدەکرێت و بۆ چەندین زمانی جیهانیش وەرگێڕدراوە.
کۆمپانیای نێت فلێکس ئەم بەرهەمەی لە ئەمریکای باکووردا نمایشکرد و دواتر لەسەر ئاستی جیهاندا بڵاویکردەوە.
دوای بڵاوبوونەوەی "ماشا و ورچ" لە تۆڕی کۆمەڵایەتیی یوتیوبدا، تێکڕای ئەڵقەکانی زیاتر لە پێنج ملیار و 500ملیۆن جار بینراوە و یەکێک لە ئەڵقەکانیشی زیاتر لە یەک ملیار بینەری هەبووە.
بەرهەمهێنەرانی ئەو زنجیرە ئەنیمەیشنە، کە لە کوردستانیش بینەری زۆری هەیە، بەنیازن لە ساڵی داهاتوودا بەردەوامی بە بەرهەمهێنانی بدەن.
"ماشا و ورچ" هەرچەند بۆ منداڵان بەرهەمهاتووە، بەڵام بەهۆی بەهێزی بەرهەمەکە چ لە رووی چیرۆک و ناوەڕۆکەوە چ لە رووی هونەرییەوە، گەورەکانیشی کردۆتە بینەری خۆی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ