رووداو-هەولێر
لەگەڵ خانمە هونەرمەندی باکووری کوردستان رۆژدا ئێستا لە باشووری کوردستانە و کار بۆ بڵاوکردنەوەی کلیپێکی گۆرانی دەکەن کە باس لە جینۆسایدی گەلی کورد دەکات.
هونەرمەندى گۆرانیبێژ حەسەن شەریف کە ساڵانێک پێشمەرگە بووە، بەرهەمەکانى زۆربەی جاران لەبارەی نیشتیمان و نەتەوەن، شەڕ هەبێت یان نەبێت، ئەو گۆرانى بۆ خاک و پێشمەرگە و وڵات دەڵێت. حەسەن شەریف کە لە تاراوگە نیشتەجێیە، لەم هەڤپەیڤینەدا لەگەڵ (رووداو) باسى کارە هونەرییەکانى و رەوشى ئەمڕۆى هونەرى کوردى دەکات.
رووداو: بەر لە هەموو شتێک، پرسیاری ئەوە دەکەم کە بۆچی گەڕاویتەوە؟
حەسەن شەریف: ئێمە بۆ کلیپکردنی گۆرانییەکی نوێ لە کوردستانین، لەگەڵ هونەرمەندی بەناوبانگی باکووری کوردستان رۆژدا لێرەم. ئەم کلیپ و گۆرانییە لە تێکستی مامۆستا ئەمین بۆتانییە، باس لە جینۆسایدی گەلی کورد دەکات، بەرهەمی تۆڕی میدیایی رووداوە و سوپاسیان دەکەم کە هاوکارمن بۆ بەرهەمهێنانی ئەم کارە.
رووداو: بۆ کلیپکردنی ئەم گۆرانییە ناوچە شوێنەوارییەکانى کوردستانت هەڵبژاردووە، وەکو قەڵای شێروانە لە کەلار و قشڵەى کۆیە، بۆچى ئەو شوێنانە؟
حەسەن شەریف: ئەم گۆرانییە لەبارەی کوردە، باس لە جینۆساید دەکات، بۆیە دەرهێنەری کلیپەکە کاک سامان عەدنان بڕیاری دا لەم لۆکەیشنانە وێنەی بگرین.
رووداو: پێشتر گۆرانییەکت بەناوی رەش و شین بڵاوکردەوە کە باس لە رووداوەکانی 16ی ئۆکتۆبەر دەکەیت، دەمەوێت زیاتر لە مەبەستی ئەم گۆرانییە تێبگەم؟
حەسەن شەریف: مەبەستی ئەم گۆرانییە روونە، باس لە خیانەتی گەورەی 16ی ئۆکتۆبەر دەکات، منیش وەکو هونەرمەندێک حەزم کرد لەم رووداوەدا گۆرانییەک بڵاوبکەمەوە کە دەڵێت: شوانی ئێمە گورگی هێنا و بەریدایە پەز و مەڕ. تێکست و ئاوازی ئەم گۆرانییە هەر هی مامۆستا ئەمین بۆتانی بوو، زۆر سوپاسی دەکەم.
رووداو: هیچ پلانت هەیە بۆ بڵاوکردنەوەی ئەلبوومی گۆرانی؟
حەسەن شەریف: کارکردن بۆ ئەلبوومی گۆرانی زەحمەتە، بەتایبەتی ئێستا، بۆیە هیچ پلانێکی نزیکم نییە، بەڵکو کارەکانم بە سینگڵ بڵاودەکەمەوە، هونەرمەندی کورد داهاتی لە کارە هونەرییەکانی دەستناکەوێت، بۆیە بەرهەمهێنانی ئەلبووم زۆر قورسە.
رووداو: ئەی لەبارەی کۆنسێرت؟ تۆ لە سوێد دەژی، لەوێ بارودۆخی کۆنسێرت چۆنە؟
حەسەن شەریف: بەگشتی کولتووری کۆنسێرت و ئاهەنگ کەمە لە کوردستان، بۆیە بارودۆخی کۆنسێرتی گۆرانی بەگشتی لە کوردستان و لە ئەوروپاش باش نییە.
رووداو: تۆ هونەرمەندێکی کە گۆرانیت بۆ هەموو بابەتەکان هەیە، هەمیشە دەڵێن منداڵ و گەنج و پیر دەتوانن گوێ لە حەسەن شەریف بگرن..
حەسەن شەریف: جا ئەمە مەبەست و پلانی منە، هونەرمەند دەبێت لە هەموو بارودۆخێک، بۆ هەموو بابەتێک گۆرانی هەبێت.
رووداو: دەتوانم پرسیاری قۆناغەکانی ژیانی تۆ بکەم؟
حەسەن شەریف: من ماوەی زیاتر لە 20 ساڵە لە ئەوروپا دەژیم، بەر لەوەش پێشمەرگە بوومە، ژیانێکی قورسم هەبووە، بەڵام پێشمەرگایەتی بە قۆناغی زێڕین و شەرەفمەندانەی ژیانی خۆم دەزانم.
رووداو: گرنگی بە نوێکردنەوەی گۆرانی فۆلکلۆر دەدەیت، ئەم ئەزموونە بۆ تۆ چۆنە؟
حەسەن شەریف: من پێموایە هونەرمەندانی کۆن و هونەری کوردی گەنجینەیەکی گەورەن، ئێمەی هونەرمەندانی ئێستا ئەرشیفێکی گەورە و دەوڵەمەندمان هەیە بۆ کارکردن لەسەری، نوێکردنەوەی گۆرانی فۆلکلۆریش کارێکە دەبێ بکرێت، ئێمە پێویستمان بەوەیە هونەری خۆمان پێشانی گەنجان و نەوەی نوێ بدەین، ئەمە ئەرکی هەموو هونەرمەندێکە.
رووداو: بەشداریکردنت لە شاکاری پێشمەرگە و شنگال لەگەڵ هونەرمەندی کورد د.دڵشاد محەممەد سەعید چۆن ئەزموونێک بوو؟
حەسەن شەریف: پێموایە ئەو شاکارە یەکێکە لەو کارە گەورانەی کە دەبێت هەموو کورد شانازی پێوە بکات، بەڕاستی ئەزموونێکی باوەڕپێنەکراو بوو، ئەزموونێک بوو کە هەرگیز لەبیری ناکەم.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ