رووداو- هەولێر
ئێوارەی رۆژی 10-2-2019 رێورەسمی دابەشكردنی خەڵاتەکانی BAFTA لە لەندەنی پایتەختی بەریتانیا بەڕێوەچوو، کە تێیدا چەندین ئەکتەر و دەرهێنەری ناودار خەڵاتی بافتایان وەرگرت.
رێورەسمی دابەشکردنی خەڵاتەکانی بافتا لە هۆڵی ئەلبێرتی دێرینی شاری لەندەن بەڕێوەچوو، کە هەزاران کەس ئامادەی ئەم رێورەسمە بوون و دەیان کەناڵی جیهانیش لەسەر فەرشی سووری فێستیڤاڵەکە رووماڵیان دەکرد، تۆڕی میدیایی رووداویش یەکێک بوو لە کەناڵانەی لەم رێورەسمەدا ئامادەبوو.
شازادەی بەریتانیا وليام و كێتی هاوژینی لە رێورەسمی دابەشکردنی خەڵاتەکانی بافتا بۆ ساڵی 2019 ئامادەبوون و لە ریزی پێشەوەی هۆڵەکە دانیشتبوون و پاڵپشتیان لە براوەکانی خەڵاتی بافتا دەکرد.
فیلمی رۆما وەکو باشترین فیلم خەڵاتی بافتای وەرگرت، کە ئەلفۆنسۆ کوارۆن دەرهێنەری ئەم فیلمە بوو، هەروەها ئەلفۆنسۆ خەڵاتی باشترین دەرهێنەریشی لە هەمان رێورەسمدا وەرگرت.
خەڵاتی بافتا بۆ باشترین خانمە ئەکتەر بەخشرا بە ئەکتەری ناودار ئۆلیڤیا کولمان لە فیلمی The Favourite ، کە رۆڵی سەرەکی هەبوو.
خەڵاتی باشترین ئەکتەری پیاو بەخشرا بە ئەکتەری ناودار رامی مالک، کە رۆڵی سەرەکی لە فیلمی Bohemian Rhapsody دەبینی.
هەروەها خەڵاتی باشترین ORIGINAL MUSIC بەخشرا بە گۆرانییەکەی لەیدی گاگا و برادلی کۆپەر، کە بە ناوی شالاو بوو.
خەڵاتی باشترین فیلمی ئەنیمیشن بەفیلمی SPIDER-MAN: INTO THE SPIDER-VERSE بەخشرا.
لە رێورەسمی دابەشكردنی خەڵاتەکانی BAFTA ، لە لەندەن بەشێکی زۆر لە میدیاکانی جیهانی چاویان لەسەر جلوبەرگ و دیزاینەکانی خانمە ئەستێرەکانی ئامادەبووی بافتا بوو.
بەشێک لە خانمە ئەکتەرەکان پارەیەکی خەیاڵی لە دیزاینکردنی جلوبەگەکانیان خەرج دەکەن، کە هەندێ جار لە ملیۆنان دۆلار تێدەپەڕێت.
بەشێوازی جیا جیا و سەیر خانمە ئامادەبووەکان جلوبەرگیان پۆشی بوو، کە چاوی کامیراکان زیاتر لەسەر جلوبەرگەکانیان بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ