رووداو دیجیتاڵ
بانکی ناوەندیی عێراق نزیکەی 320 ملیۆن دۆلاری خستەڕوو و ئەوەش بووە هۆکاری بەرزبوونەوەی بەهای دینار و 100 دۆلار بە 143 هەزار و 750 دینار مامەڵەی پێوەدەکرێت.
رۆژی چوارشەممە 19ـی نیسانی 2023، بانکی ناوەندیی عێراق 319 ملیۆن و 595 هەزار و 917 دۆلاری خستەڕوو؛ لەو بڕە 225 ملیۆن و 900 هەزار دۆلاری بۆ نەختینە و ئەوی دیکەی بۆ حەواڵەیە.
جەبار گۆران، گوتەبێژی بازاڕی دۆلارەکەی سلێمانی لەو بارەوە بە تۆڕی میدیایی رووداوی گوت: "ئەمڕۆ لەکاتی کردنەوەی بازاڕدا 100 دۆلار بە 144 هەزار و 250 دینار مامەڵەی پێوەکرا، بەڵام دوای فرۆشتنی دۆلار لە بانکی ناوەندیی عێراق، ئێستا [کاژێر 15:30] 100 دۆلار بە 143 هەزار و 750 دینار مامەڵەی پێوە دەکرێت."
هاوکات لە بازاڕی ئاڵوگۆڕی دراو لە هەولێر 100 دۆلار بە 143 هەزار و 750 دینار مامەڵەی پێوە دەکرێت.
رۆژی 11-12-2022، بۆ یەکەمجار دوای نزیکەی دوو ساڵ، بەهای 100 دۆلاری ئەمریکی 150 هەزار دیناری عێراقی تێپەڕاند و دواتر گەیشتە 175 هەزار دینار.
دوای زیاتر لە دوو مانگ لە دابەزینی بەرچاوی بەهای دینار، رۆژی 7-2-2023، ئەنجوومەنی وەزیرانی عێراق بڕیاری ئەنجوومەنی ئیدارەی بانکی ناوەندیی عێراقی پەسندکرد، بەوەی دەستکاریی نرخی فرۆشتنی دۆلار لە بەرامبەر دیناری عێراقی بکرێت، بەشێوەیەک 100 دۆلار بدرێتە 130 هەزار دینار بە بانکەکان و بە 132 هەزار دینار بگاتە کۆمپانیاکان.
9ـی ئەم مانگە بۆ یەکەمجار بەهای دینار بەرزبوویەوە و 100 دۆلار بە 145 هەزار مامەڵەی پێوەکرا و دواتر بەهای دینار بەرزتربوویەوە و 100 دۆلار بوو بە 142 هەزار دینار.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ