RÛSYA - Li mizgefteke bajarê Kazan xelk fêrî ola Îslamê dibin

Hewlêr (Rûdaw) - Li bajarê Kazan ku dikeve başûrê rojavayê Rûsyayê, Desteya Rûhî ya Misilmanên Teter Mizgefta Galeev vekirine ku îbadet têde tê kirin û herwiha dersên taybet bi ola Îslamî jî tên xwendin.

 

Li Mizgefta Galeev dersên fêrbûna ola Îslamê çend hefteyan berdewam dibin û di wan dersan de amadevan bi pênc dersan fêrî bingehên serekî yên Îslamî dibin.

 

Melayê mizgeftê Muhammad Miftakhov dibêje: “Zanyarî wek mifteyê ne. Lewra her pênc ders destpêka hebûna wan zanyariyan e. Bêguman, em girîngiyê bi tiştên serekî didin û di Îslamê de jî nimêjkirin tişta herî girîng e. Bêguman tişta yekem ku divê bizanin hebûna bawerî û piştre jî nimêj dibe. Nabe kesek jî were neçarkirin daku ola xwe bi Îslamê biguhere, eger ew kes bi xwe nexwaze.”

 

Ders bê beramber in û bi herdu zimanên Rûsî û Teterî tên dayîn, her kesek jî temenê wî/ê zêdeyî 12 salan be dikare beşdar bibe, êdî ne girîng e ser bi çi olekê ye. Venera Gaynanova yek ji wan kesa ye ku beşdarî dersan bûye û hest bi kêfxweşiyeke zêde dike ku derbarê Îslamê de fêrî tiştên serekî dibe.

 

Venera Gaynanova dibêje: “Ezmûna min a nimêjkirinê nebû. Kesî ez fêrî nimêjkirinê nedikirim, lê min dixwest fêr bibim. Destpêkê di serê her kesekî de çendîn pirsyar hene û pêdiviya min jî bi cihekî wek vê derê hebû daku pirsyar bikim û fêrî wê yekê bibin bi rastî nimêja xwe bikin.”

 

Li gor zanyariyên fermî, nêzîka 10 milyon ji akinciyên Rûsyayê misilman in û ew jî rêjeya nêzîka ji sedî 7ê daniştvanên wî welatî pêk tînin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger