Hewlêr (Rûdaw) - Li navçeya Çeşmeyê ya parêzgeha Îzmîrê belemeke koçberan bin av bû û 10 koçberên di belemê de hatin rizgarkirin lê kesek wenda ye.
Fermandariya Ewlehiyê ya Peravan a Tirkiyeyê îro li ser malpera xwe ya fermî ragihand ku li navçeya Çeşmeyê ya Îzmîrê belemeke koçberan bin av bûye û wan li ser agahdarkirinê 3 belemên ewlehiya peravan û helîkopterek ji bo rizgarkirina koçberan şandine cihê bûyerê.
Li gorî daxuyaniyê di encama xebatên tîmên Ewlehiya Peravan de 10 koçberên di belemê de hatin rizgarkirin û xebat ji bo dîtina koçberekî wenda berdewam berdewam dikin.
Li gorî amarên Rêxistina Navneteweyî ya Koçê (IOM) ji destpêka îsal heta 7ê Tîrmeha 2024an wate di 6 mehan de 878 koçber di nav Deryaya Spî de wenda bûne.
Herwiha li gorî amarên Wezareta Karên Navxwe ya Îtalyayê jî ji destpêka salê heta 5ê Tîrmehê 26 hezar û 202 koçber bi rêya deryayê çûne wî welatî.
Par heman amar 67 hezar û 102 kes bûn.
Li gorî amarên Wezareta Karên Navxwe ya Îtalyayê îsal li gorî par çûna koçberan ji sedî 40 kêm bûye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse