Hewlêr (Rûdaw) - Cîgirê serokwezîrê Sûriyê û wezîrê bazirganiya navxwe, Qedrî Cemîl ji Rûdawê re ragihand ku gelê kurd li navçeyên kurdî helwesteke pêşketî, aştiyane û niştimanî ya paye bilind nîşan dane, lewra niha grûbên radîkal tolê jê vedikin û komkujiyan li dijî wan bikar tînin.
Cemîl diyar kir ku pêwendiyên hikûmeta Sûriyê ligel partiyên kurd bi giştî baş in, ew beşeke sereke ne ji opozisyonê û dê beşdarî kongreya Cenêv 2 bibin.
Derbarê rêvebirina herêmên kurdî de, Qedrî Cemîl got: “Ew herêm di destê xelkê wan herêman de ye. Hêzên ku hebûna wan li ser erdê heye û dijî destêwerdana derve ne û Rêvebriya xweserî damezrandine, wan herêman birêve dibin. Lê hinek hêzên hikûmeta Sûriyê jî li Qamişlo û Hesekê hene.”
Derbarê têkiliyên hikûmeta Sûriyê û Partiya Yekîtiya Demokratîk (PYD) de Cemîl wiha got: “Rewşa li ser erdê şêweyê hevsaziyê di navbera hêzên ku xelkên sivîl diparêzin û yekîneyên artêşa Sûriyê de ferz dike. Ev de facto ye û hevsasî di navbera herdu aliyan de karekî jîwarî ye û heye.”
Li ser raporta televizyona Rûsya Îro ku gotibû firokexaneya Qamişlo bi şêweyekî hevbeş di navbera artêşa Sûriyê û Yekîneyên Parastina Gel (YPG) ser bi PYDê ve tê parastin, Cemîl got: “Ev yek rast e û geştên di navbera Şam û Qamişlo de bi şêweyekî normal encam didin.”
Cemîl destnîşan kir ku ger rêkeftin di navbera hêzên Sûriyê û YPGê de hebe, ew rêkeftineke navxwe ye ku rewşa li ser erdê ferz kiriye.
Derbarê daxwazên kurdan de û bi taybetî daxwaza federalîzmê, Cemîl wiha got: “Nabe aliyekî kurd bi tena xwe mafên kurdan destnîşan bike, divê hemû aliyên kurd bi hev re van mafan destnîşan bikin. Bi şêweyekî aştiyane û bi diyalogê di çarçoveya Sûriyê de werin gûftogokirin. Di rewşa Sûriyê de kurd parek in ji maseya diyalogê, divê bi tifaqiya tevahiya sûriyan ji şêweyê çareserkirina pirsa kurd razîbin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse