Rêberê tevgera Sedr: Divê ew zû werin cezakirin

Hewlêr (Rûdaw) – Muqteda Sedr ragihand, ew qebûl nakin ti kes an jî aliyek bi navê Heşda Şeibî beşdarê hilbijartinên giştî yê Iraqê bike. Herwiha bang li Ebadî kir, ku demildest kesên gendelkar ceza bike.

 

Rêberê tevgera Sedr, Muqteda Sedr îro Duşemê 11-12-2017, derbarê rewşa Iraqê û bidawîbûna şerê DAIŞê gotarek pêşkeş kir û got: “Artêşa Iraqê xakên hatibûne firotin rizgar kir.”

 

Sedr amaje bi wê yekê kir, ku hêzên Seraya Selam a ser bi tevgera wî ve çekên dewletê radest bikin û herwiha di demekê kurt de navçeyên hatine azadkirin jî bidin kontrola artêşê.

 

Muqteda Sedr derbarê grûba Seraya Selam jî got, ku dê hêzên wan li Samarayê bimînin.

 

Rêberê tevgera Sedr behsa hilbijartinên Parlamentoya Iraqê û paşeroja Heşda Şeibî jî kir û got: “Divê beşek ji hêzên Heşda Şeibî tevlê nav artêşê bibin. Nabe rê bidin ti kes an jî aliyekê bi navê Heşda Şeibî beşdarê hilbijartinan bibe.”

 

Derbarê gendeliya li Iraqê jî Sedr diyar kir: “Divê hikûmeta Iraqê rûbirûyê gendelkaran bibe û divê Ebadî demildest gendelkaran ceza bike.”

 (N.S)

 

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger