PDK-Tê 3emîn kongreya xwe li Enqereyê saz kir û Nehmed Emin Kardaş car din wek serokê giştî hat hilbijartin
Enqere (Rûdaw) - Partiya Demokrat a Kurdistanê Tirkiye (PDK-T), 3emîn kongreya xwe piştî 3 salan li Enqereyê saz kir. Di kongreyê de serokê heyî Mehmed Emin Kardaş carekê din wek serokê nû yê PDK-T hate hilbijartin. Kardaş ji Rûdawê re da zanîn ku ew ê di heyama nû de zêdetir girîngiyê bidin tifaqa nav partiyên Kurdan.
Partiya Demokrat a Kurdistanê Tirkiye PDK-T, 3emîn kongreya xwe ya asayî piştî 3 salan li Enqereya paytexta Tirkiyê li eywana otêleke saz kir.
Di kongreya PDK-T de tekane namzedê serokatiyê serokê heyî Mehmed Emin Kardaş bû. Kardaş bi dengê 51 delegeyan bo cara 3yan wek serokê nû yê PDK-T hate hilbijartin.
Serokê PDK-Tê Mehmed Emin Kardaş ji Rûdawê re got: “Me di vê kongreyê de biryara xebat û yekrêziya di nav hemû partiyên Kurdan de daye. Em hêvî dikin ku partiyên Kurdî êdî li gel hev tevbigerin. Kurdistan a me hemû Kurdistaniyan e û divê em hemû bi hev re biryarê bidin.”
PDK-T ku li 5 bajêr (Amed, Êlih, Mêrdîn, Edene, Mêrsin), û li 4 navçeyan (Qoser, Sûr, Kayapinar, Akdeniz) xwedî rêxistin e, piştî kongreyê amadehî dike ku li hin bajarên Bakurê Kurdistanê rêxistinên xwe ava bike û li qadê zêdetir çalak be.
Serokbajarê Mêrdînê yê PDK-Tê Cengiz Bozkurt jî got: “Niha li Mêrdînê li Qoserê rêxistina me heye. Di nêz de em dê li Nisêbîn û Dara Mazî jî rêxistinên xwe ava bikin.”
Rêvebera PDK-Tê Têkoşîn Soysal jî dibêje: “Em dixwazin xort, ciwan û jinên me werin tevli partiya me bibin. Ji bo yekîtî Û dewletbûnê em dixwazin kar bikin.”
PDK-T, li gel çend partiyên Kurdî di hilbijartinên herêmî yên sala 2019an de li gel HDPê tifaqeke Kurdistanî damezrandibû û di nav lîsteyê de Şaredariya navçeya Çinara Amedê qezenc kiribû. Rêveberiya PDK-T ji ber sedema pandemiyê tu partiyeke siyasî venexwend kongreyê.
Rêveberê PDK-T Murat Yilmazer jî wiha axivî: “Em dixwazin li ser axa Kurdistanê tifaq û yekîtiya me hebe. Em dixwazin Kurdistan ava bibe. Em biratiya gelê xwe dixwazin. Em biratiya gelek din naxwazin.”
PDK-T ya ku di sala 2014an da hatibû damezrandin li Tirkiye û bakurê Kurdistanê yek ji partiyên fermî ye ku bi navê Kurdistanê hatiye damezrandin. Lê Dadgeha Destûra Bingehîn li gel 3 partiyên Kurdistanî li dijî PDK-T jî bi hinceta ku di navê wê de Kurdistan heye doza girtinê vekiribû ku hîn ew doz berdewam dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse