Efrîn (Rûdaw)- Hêzên asayişa ser bi Kantona Efrînê, êrişî merasîma 117emîn Salvegera Rojnamegeriya Kurdî kirin û bi zorê xelk belav kirin.
Ew merasîma li bajarokê Meydankê hatibû lidarxistin. Piştî destpêkirina rêwresmê hêzên ser bi aşatiya Kantona Efrînê ku ji aliyê PYDê û hevpeymanên wê ve tê birêvebirin, êriş kirin ser merasîmê.
Merasîma ku bi sirûda Ey Reqîb dest pê kir, bi stran, dîmenên folklora kurdî û axaftnên cuda berdewam bû.
Çekdarên asayişê dest bi teqekirinê li ser amadebûyan kirin, lê merasîm her berdewam kir. Piştî wê yekê çend kes ji rêveberên rêwresmê hatin girtin û di bin guvaşa xelkê de hatin azadkirin.
Asayişa Kantona Efrînê dibêje, ji ber ew merasîm bê wergirtina destûrê hatiye lidarxistin, wan rê lê girtiye, lê PDK-Sê û partiyên din yên di nav Encumena Niştimanî ya Kurd (ENKS) de îtîrafê bi kantonan nakin û ji ber wê jî destûra lidarxistina çalakiyan ji wan nastînin.
Berpirsê ofîsa Hewlêrê ya PDK-Sê, Saîd Omer ji Rûdawê re ragihand: “Êrişkirina ser xelkê û wê merasîmê bi awayekî gelekî neşaristanî bû.”
Saîd Omer wiha got: “Kurd li her cihekî bi helkefta Roja Rojnamegeriya Kurdî çalakiyan li dar dixin û rojeke niştimanî ye û ti têkiliya wê bi ti ecindeyeke siyasî û derve tine ye.”
Wî berpirsê PDK-Sê bal kişand ku ev ne cara yekê ye ku bi gotina wî, asayişa PYDê êrişî ser çalakiyên partiya wan dike û rêgiriyê li wan dike, ku çend caran jî êrişî avahiyên wan li Efrînê kiriye û girtine.
Bi baweriya Saîd Omer, dibe ku planek li dijî PDK-Sê hebe.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse