Hewlêr (Rûdaw) – Asayişa Hewlêrê desteserkirina kesekî ragihand û eşkere dike ku destpêka vê mehê li Mûsilê teqînek encam daye.
Rêveberiya Asayişa Hewlêrê di daxuyaniya xwe de diyar kiriye: “Piştî rûdana teqîna terorîstî ya bi motorsîkletê li bajarê Mûsilê li ber komelgeha rewşenbîrî di roja 04-05-2019an de, ji aliyê çavkaniyên me ve li ser tohmetbarê ku ev karê terorîstî kiribû û reviyabû, zanyarî gihiştin me.”
Asayişa Hewlêrê dibêje: “Tîmên me li ser vê mijarê lipeyçûn û lêkolînên bi hûrgilî kirin û tohmetbarê bi navê Ehmed Mihemed Mihêdî Salih desteser kirin, di lêpirsînê de jî tawana xwe li xwe mikur hat.”
Di daxuyaniyê de hatiye: “Niha Ehmed Mihemed Mihêdî Salih bi madeya çar/1 a terorê girtî ye, li ser fermana dadgerê lêkolînê û li gor taybetmendiyên yasayî, li gel dadgeha peywendîdar a li hikûmeta federalî, ji bo radestkirin û pêkanîna rêkarên yasayî hevahengî tê kirin.”
Di teqîna roja 04-05-2019an a li ber komelgeha rewşenbîrî ya Mûsilê de ku bi rêya motorsîkletekê hatibû encamdan, sê kes birîndar bûbûn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse