Rûdaw
Hewlêr (Rûdaw) - Li gelek navçe û bajarên Bakurê Kurdistanê şer û alozî berdewam e û rojane nav bajaran bi hinceta hebûna gerîlayên PKKê tên topbarankirin û her diçe rewş kambaxtir dibe.
Li navçeya Geverê ya Colemêrgê, Nisêbîna Mêrdînê û Silopiya Şirnexê, ji aliyekî ve operasyon û li aliyê din lêgerîna nav malan û şer û pevçûn û topbarankirin didome.
Li Geverê ku ji 13ê Adarê ve qedexeya derketina derve hatiye ragihandin, li navçeyê operasyon berdewam in û li gor welatiyên derdora deverê şev û roj dengê teqe, gule û topbaranê qut nabe.
Li Nisêbînê jî ku pêr du dibistan û navendeke tendirûstiyê hatibûn şewitandin, operasyonên hêzên dewletê bi hinceta rakirina berbestan berdewam in û ji ber 33 roj in ketin û derketina nav bajêr qedexe ye, bi awayekî baş nayê zanîn ka li navçeyê çi diqewime.
Li Silopiyê ku qedexe didome û tê gotin operasyon hatine rawestandin, gera li nav malan û rûxandina avahiyan wek di dîmenan de jî dixwiye berdewam e.
Li navçeyê ku ji 5ê Nîsanê ve qedexe hatiye ragihandin, du roj dibe, bêdengî serdest e lê bi dozeran avahî tên wêrankirin.
Ji aliyekî din ve, li gor medya Tirkiyê, ji ber şer û pevçûnên vê dawiyê ku hêzên dewleta Tirkiyê gelek kuştî dan, psîkolojiya leşker û tîmên taybet têk çûye û Serfermandariya Tirkiyê derûnnas şadine navçeyê.
Berî niha jî hatibû ragihandin ku 1000 tîmên taybet destjikarkişandina xwe dane aliyên peywendîdar lê bersiveke negatîf wergirtine.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse