Hewlêr (Rûdaw) – Dadgeha Tawan a Hewlêrê cezayê sêdaredanê bo 4 tawanbarên teqîna 9 sal pêş a li Mexmûrê diyar kir, ku di encama wê teqînê de 36 kes şehîd bibûn û zêdetirî 150 birîndar bibûn.
Dadgeha Tawan a Hewlêrê roja 14ê Kanûna 2016ê, ji bo 4 kesan ku bi encamdan û alîkariya di teqîna xwekujiya 9 sal pêş a li navçeya Mexmûrê hatibûn tohmetbarkirin, cezayî îdamê birrî.
Kargêrê Liqa 23 a Partiya Demokrata Kurdistanê (PDK) li Mexmûrê, Elî Mihemed ji Rûdawê re ragihand: “Di dosyaya wê êrişa terorîstî ya sala 2007ê de, hejmarek kes dest têde hebûn, lê belê piştî lêkolînan û rêkarên yasayî, Dadgeha Tawan a Hewlêrê cezayê sêdaredanê ji 4 kesan re derxist. Ew 4 kes tohmetbarên sereke yên wê bûyera terorîstî bûn.”
Elî Mihemed herwiha got: “Ji bilî ku ew bûyer, tawaneke mezin a terorîstî li dijî asayiş û îstiqrara Herêma Kurdistanê bû, herwiha kesûkarên şehîd û birîndaran bûyerê jî doz vekiribûn. Ez bi xwe ku kurê min di wê teqînê de şehîd bû û ez jî birîndar bûm, min doz li dijî tohmetbaran vekiribû.”
Roja 13ê Gulana 2007ê kesekî xwekuj bi kamyoneke tijî madeyên teqandinê, xwe bi avahiya Baregeha Liqa 23 a PDKê ya li navçeya Mexmûrê ve teqandibû, ku di encamê de 36 kes şehîd bibûn û zêdetirî 150 kesên din jî birîndar bibûn.
Hatibû ragihandin, ku 1 ton madeyên teqandinê di wê kamyona bombekirî de hatibû bicihkirin, ya ku kesekî xwekuj bi wê kamyonê, xwe bi navenda PDKê ya Mexmûrê ve teqandibû.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse