Şandeke PYDê li Başûrê Kurdistanê ye.
Silêmanî (Rûdaw) - Hevserokê PYDê Şahoz Hesen ragihand, eger Rêveberiya Xweser beşdarî di gotûbêjên aliyên siyasî yên Sûriyê de neke, ew gotûbêj sernakevin.
Îro şandeke PYDê serdana bajarê Silêmaniyê li Başûrê Kurdistanê kir û bi cuda li gel berpirsên Yekîtiya Niştîmaniya Kurdistanê (YNK) û Tevgera Goranê civiya.
Şanda PYDê rewşa dawî ya Rojavayê Kurdistanê ligel aliyên siyasî li Silêmaniyê gotûbêj kirin.
Hevserokê PYDê Şahoz Hesen ji Rûdawê re ragihand, gelek giring e ku Rêveberiya Xweser beşdarî civînên opozisyonê û hikûmeta Sûriyê de bibe, daku ew civîn serkeftî bin û bigihin encamê.
Şahoz Hesen tekez kir ku divê nûnerên Rêveberiya Xweser rasterast di danûstandinên Cenevê û komîteya destûrê de beşdar bibin.
Hevserokê PYDê diyar kir, li bakurê rojhilatê Sûriyê, “Meclîsa Sûriyeya Demokratîk û Rêveberiya Xweser a Demokratîk hene û divê nûneratiya wan di danûstandinên derbarê rewş û çarenivîsa Sûriyê de hebe.”
Şahoz Hesen di berdewamiya axaftina xwe de amaje bi xwestek û projeya partiya xwe li Sûriyê kir û got, ew “Sûriyeyeke demokratîk û nenavendî” dixwazin û tekez kir, “di çarçoveyeke destûrî de divê mafên hemû gelan û bi taybet mafên gelên Kurd bêne garantîkirin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse