Hewlêr (Rûdaw) – Artêşa Tirkiyeyê 4 gundên nahiyeya Şêrawayê ya Efrîna Rojavayê Kurdistanê topbaran kirin.
Li gorî agahiyên çavkaniyên xwecihî, Tirkiyeyê şeva borî gundên Dêr Cemal, Bênê, Aqîbê û Xirêbkê yên Şêrawayê topbaran kirin.
Heta niha li ser encamên êrişa Tirkiyeyê ti agahî nehatine bidestxistin.
Beriya topbaranê jî balafirên çavdêriyê yên Tirkiyeyê li asmanên herêmê difiriyan.
6ê vê mehê jî droneke Tirkiyeyê li gundê Herbilê yê navçeya Şehbayê malek bombebaran kir û ziyanên madî gihiştin wê malê.
Dagirkirina Efrînê
Tirkiyeyê bi piştgiriya çekdarên mixalefeta Sûriyeyê 20 Kanûna Paşîna 2018an êrişî Efrînê kir.
Şer û pevçûnan 58 rojan ajot lê Tirkiyeyê û grûpên çekdar Efrin dagir kir.
Di van 6 salan de li Efrînê binpêkirinên zêde mezin ên wekî talankirin, kuştin û guhertina demografiyê ji aliyê grûpên çekdar ên ser bi Tirkiyeyê ve hatin kirin.
Di encama êrişên giran û dagirkirinê de bi sed hezaran Kurd ji mal û milkên xwe bûn û ketin ser rê û dirbên koçberiyê.
Tevî ku Neteweyên Yekbûyî, rêxistinên pêwendîdar û aliyên siyasî yên Kurdî vê dagirkeriyê protesto dikin jî dagirkerî û tawanên hovane yên li dijî Kurdên Efrînê berdewam dikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse