Hewlêr (Rûdaw) - Saziya hilbijartinan a Yekîtiya Niştimanî ya Kurdistanê daxuyaniyek li ser encamên hilbijartinên parlemena Kurdistanê da û têde ragihand, eger Komîsyona Hilbijartinan dozên siyasî û îspatkirî li ber çavan negire, ew dê helwestekî cudatir nîşan bidin.
Saziya Hilbijartinan a YNKê herwiha di daxuyaniya xwe de dibêje, ragihandina %85ê encamên hilbijartinan, li cem wan zêdetir guman çêkiriye û wan beriya encamdana hilbijartinan jî daxwaza paqijkirina lîsteya tomara dengderan kiriye.
Li gorî daxuyaniyê Saziya Hilbijartinan a YNKê dibêje, wan herwiha li Komîsyona Hilbijartinan û Encûmena Dadweriyê jî doz tomar kirine, lê bêyî ku ti hincetek hebe, ew daxwazên wan li ber çavan nehatine girtin.
Saziya Hilbijartinan a YNKê dide xuyakirin, ku herî dawiyê şeva beriya hilbijartinan jî, komîsyonê hinek biryarên lezgîn derxistin û ji ber wê yekê jî bi hezaran kesan nekarîn dengên xwe bidin.
Wê saziya ser bi YNKê ve herwiha ragihandiye, ku divê Komîsyon li gorî rola xwe ya dîrokî kar bike û bi awayekî bêalî, di çarçoveya yasayn de bixebite û wan hemû dozan yekalî bike ku hatine tomarkirin, nexwe ew dê helwestekî cudatir nîşan bidin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse