OPEC civîneke bilez saz dike
Hewlêr (Rûdaw) - Herçiqas biryar bû civîna demsalî ya OPECê di rojên 5 û 6ê Adara îsal de were kirin, lê belavbûna vîrûsa Korona û daxistina bihayê petrolê bi rêjeya ji sedî 15 bû sedem ku Erebistana Siûdiyê daxwaza civîneke bilez a berhemhênerên petrolê bike.
Li gor amarên Wezareta Enerjiyê ya Çînê, ji ber belavbûna vîrûsa Korona daxwaza Çînê bo bikaranîna petrola xav bi rêjeya ji sedî 20 wate rojane 3 milyon bermîl kêm bûye.
Rêveberê Cîbicîkar ê Kompanyaya Rawêjkarî Again Capital John Kilduff di vê derbarê de dibêje: “Bêguman piştî sala 2019ê ev şoka herî mezin e di bazara petrolê de. Heta berî belavbûna Korona geşbînî li ser bilindbûna xwesteka bo petrola xav hebû.”
Tevlîhevbûna bazara petrolê wiha kiriye ku berhemhênerên petrolê bikevin tevgerê û hewlên xwe berfireh bikin daku nehêlin zêdetir bihayê petrolê dakeve.
Wezîrê Enerjiyê yê Siûdiyê roja Pêncşemê demjimêrekê û roja Înê nîv demjimêrê bi telefonê ligel Wezîrê Enerjiyê yê Rûsyayê axifiye daku wî razî bike bibe hevkar bo dirêjkirina rêkeftina navbera wan bo kêmkirina rojane 1 milyon û 700 hezar bermîl di bazaran de.
John Kilduff derbarê hewlên berhemhênerên endamên OPEC û derveyî OPECê ku wek OPEC-Plus tê naskirin dibêje: "Eger OPEC-Plus karekî bo çareserkirina vê pirsgirêkê neke, bihayê petrolê zêdetir dadikeve".
Biryar e rojên Sêşem û Çarşemê yên vê hefteyê civîna Komîteya Çavdêrî ya Berhemhênerên Petrolê bê sazkirin û piştî civînê jî komîteya navborî rapora xwe dide wezîrên petrolê.
Ji xeynî dirêjkirina dema rêkeftinê, li gor hinek çavkaniyên nav OPECê, hatiye pêşniyarkirin ku bo rêgirtin li daketina zêdetir a bihayê petrolê rojane 500 hezar bermîl petrola zêdetir li bazaran bê kêmkirin.
Meha Kanûna Sala 2019ê berhemhênerên rêkeftin ku asta kêmkirinê bo rojane yek milyon û 700 hezar bermîl zêde bikin bi hêviya ku bihayê petrolê di asteke bilind de bimîne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse