یەکێتیی ئەورووپا سزای بەسەر وەزیری بەرگریی ئێراندا سەپاند

 

 

رۆژی هەینی، ئەنجوومەنی یەکێتییەکە رایگەیاند، "ئەمڕۆ ئەنجوومەن کۆتوبەندی خستەسەر شەش کەسایەتی و سێ دامەزراوە بەهۆی ئەوەی دەستیان هەبووە لە گواستنەوەی درۆن بۆ رووسیا بۆئەوەی پشتیوانیی جەنگی دووژمنکارانەی دژی ئۆکراینا بکات. ئەوان دەستیان هەبووە لە گواستنەوەی درۆن یان مووشەک بۆ گرووپە چەکدارەکان و ئەو لایەنانەی ئاشتی و سەقامگیریی رۆژهەڵاتی نێوەڕاست و ناوچەی دەریای سوور تێکدەدەن؛ یان پەیوەندییان بە بەرنامەی درۆنی ئێرانەوە هەیە."

 

بارەگەی ناوەندیی خاتەمول ئەنبیا، کە لقێکی سەر بە سوپای ئێرانە و گوایە بەرپرسە لە بڕیاری جێگیرکردنی درۆنەکان، لەگەڵ یەکێک لە فەرماندەکانی لەنێو لیستی سزا نوێیەکانی ئەورووپادایە؛ هەروەها کۆمپانیای بەرهەمە ئەلیکترۆنییەکانی کاوان بێهراد بەهۆی دابینکردن و فرۆشتنی کەرەستە بۆ درۆنەکانی ئێران، لەگەڵ هێزی دەریایی سوپای پاسداران و ئەفشین خواجە فەرد، سەرۆکی دامەزراوەی پیشەسازیی ئاسمانیی هێزە چەکدارەکانی ئێران خراونەتە لیستەکەوە.

 

ئەوانەی سزایان بەسەردا سەپێندراوە، سامانیان سڕ دەکرێت و گەشتکردنیان بۆ یەکێتیی ئەورووپا لێ قەدەخە دەکرێت؛ هەروەها هەموو مامەڵەیەکی دارایی لەگەڵیان قەدەخە دەکرێت.