لە ئیندۆنیزیا 12 کەس بەهۆی خواردنەوەی کحولی ساختەوە گیانیان لەدەستدا

 

واوان گیۆنان، گوتەبێژی نەخۆشخانەی سۆبانگی گشتی لە دوورگەی جاڤا رایگەیاند: ''درەنگیی شەوی شەممە، 28ی ئۆکتۆبەر بەهۆی خواردنەوەی کحولی ساختەوە 18 کەس گەیێندرانە هۆبەی فریاکەوتن، 12یان گیانیان لەدەستدابوو، ئەوانە تووشی ژەهراویبوونی گەدە بوون. پێنج کەسی دیکەش تەندروستییان ناجێگیرە و لە چاودێری چڕن''.

 

بە گوتەی بەرپرسانی نەخۆشخانەکە، تەمەنی ئەو کەسانەی گیانیان لەدەستداوە و یان بەهۆی ژەهراویبوونەوە رەوانەی نەخۆشخانە کراون، لە نێوان 16-45 ساڵاندا بووە.

 

ئاریک ئاندرا، بەڕێوەبەری پۆلیسی سۆبانگ رایگەیاندووە ئەو کەسانە کحولیان دروستکراو بە قاچاخ و خۆماڵییان کڕیوە لە ئاهەنگێکی شەوان خواردوویانەتەوە. دەشڵێت، لەسەر ئەو رووداوە کەسێکیان دەستگیر کردووە و لێکۆڵینەوەی لەگەڵدا دەکەن.

 

لە رووداوێكی هاوشێوەدا و لەساڵی 2018 زیاتر لە 60 کەس بەهۆی خواردنەوەی کحولی "خۆماڵی و هەرزان" گیانیان لەدەستدا، لە دوای رووداوەکەش پۆلیسی ئیندۆنیزیا هەڵمەتێکی بۆ داخستن و گرتنی ئەو کەسانەی دەستپێکرد کە کحولی ساختە دروستدەکەن و ئەوکات 6 کەس دەستگیرکران، یەکێک لەوانە دەرمان مێشی تێکەڵی کحول کردبوو.