نەتەوە یەکگرتووەکان سەرکۆنەی مامەڵەی هێزە ئەمنییەکانی ئێران بەرامبەر خۆپێشاندەران دەکات

 

دوای پرسیارێکی مەجید گلی، ئیدیتۆری دیپلۆماسیی تۆڕی میدیایی رووداو لە نیویۆرک لەبارەی هەڵوێستی نەتەوە یەکگرتووەکان لەبارەی خۆپێشاندانەکانی رۆژهەڵاتی کوردستان و ئێران و، مامەڵەی هێزە ئەمنییەکان لە بەرامبەریان، ستیڤان دوجاریک، گوتەبێژی نەتەوە یەکگرتووەکان ئەمڕۆ هەینی، 28-10-2022، بە رووداوی گوت، بە تەواوی "سەرکۆنەی ئەو کوشتنانە دەکەین" کە هێزە ئەمنییەکانی ئێران بەرامبەر بە خۆپێشاندەران ئەنجامی دەدەن.

 

زیاتر لە 40 رۆژە و دوای گیانلەدەستدانی کچە کوردی شاری سەقز ژینا ئەمینی، کە باوکی رایگەیاند، دوای دەستگیرکردنی کوژراوە، خۆپێشاندان و ناڕەزایی رۆژهەڵاتی کوردستان و ئێرانی گرتووەتەوە و بەو هۆیەوە دەیان کەس گیانیان لەدەستداوە و برینداربوون.

 

خۆپێشاندان و ناڕەزایەتییەکان لە ئێران و رۆژهەڵاتی کوردستان بەردەوامن، رۆژی پێنجشەممە چەندین شاری رۆژهەڵاتی کوردستانی گرتەوە، وەکو مهاباد، بۆکان، میاندواو، پیرانشار، سنە، مەریوان، بانە، سەقز، خۆڕەمئاوا و بروجیرد. لە بەشێک لە شارەکانی مەشهەد، ئەراک، شیراز، کەرەج، ئەهواز، شوش و زاهیدان شەوی رابردوو خۆپێشاندان و ناڕەزایەتیی بەڕێوەچوون. لە تارانیش لە چەند ناوچەیەکی ئەو شارە خۆپێشاندان کرا.

 

ئاژانسی مافی مرۆڤی کوردپا رایدەگەیێنێت، تەنیا لە ماوەی دوو رۆژی رابردوودا 11 کەس لە رۆژهەڵاتی کوردستان بە تەقەی راستەوخۆی هێزە ئەمنییەکانی ئێران گیانیان لەدەستداوە، بە گشتییش لە سەرتاسەری ئێراندا تائێستا 250 خۆپێشاندەر گیانیان لەدەستداوە و هەزاران کەسیش بریندارکراون.