نرخی بەنزین لە ئەمریکا بەرزبووەوە

 

 

کۆمەڵەی شۆفێرانی ئەمریکا رۆژی هەینی 28-07-2023 رایگەیاند، لە سێ رۆژی رابردوودا نرخی بەنزین لە ئەمریکا 12 سەنت بەرزبووەتەوە.

 

کۆمەڵەکە دەڵێت، نرخی گالۆنێک بەنزین کە دەکاتە 3.7 لیتر، گەیشتووەتە 3 دۆلار و 71 سەنت، ئەوەش لە دەیەی رابردوودا دووەم بەرزترین نرخە لەم کاتەی ساڵدا و تەنیا ساڵی رابردوو بەرزتر بووە.

 

هەرچەندە مانگی رابردوو هەڵاوسان لە ئەمریکا بۆ 3% دابەزی، کە نزمترین ئاستە لە دوو ساڵی رابردوودا، بەڵام بەنزین یەکێکە لەو شتانەی زۆرترین خەرجیی ئەمریکییەکان دەگرێتەوە.

 

ساڵی رابردوو بەهۆی کاریگەرییەکانی شەڕی ئۆکراینا و بەرزبوونەوەی هەڵاوسانەوە، نرخی گالۆنێک بەنزین لە ئەمریکا گەیشتە 5 دۆلار؛ 1.15 دۆلار بۆ هەر لیترێك. لە هەندێک لە ویلایەتەکانی وەکو کالیفۆڕنیاش گەیشتە 6 دۆلار.

 

نرخی بەنزین کە بەهۆی ترسی دابینکردن و زۆریی خواست لە وەرزیی هاویندا بەرزبووەتەوە، مەترسیی لەسەر جۆ بایدن، سەرۆکی ئەو وڵاتە دروستکردووە کە دووبارە هەڵبژاردنەوەی لە ساڵی داهاتوودا بەشێکی پەیوەستە بە سنووردارکردنی هەڵاوسان و گەڕاندنەوەی متمانەی بەکاربەران.