بانکی جیهانی: ساڵانە 5.7 ملیۆن کەس بەهۆی هەوای پیسەوە گیان لەدەستدەدەن
رووداو دیجیتاڵ
هەوای پیس، ئەو ژەهرەیە کە بە بێدەنگی مرۆڤ دەکوژێت، بەڵام راپۆرتێکی نوێی بانکی جیهانی دەڵێت، ئەم ژهرە بێ چارەسەر نییە،
بەڵکو دەکرێت لە رێگەی دەرکردنی یاسا و سیاسەتی تایبەتەوە، تاوەکو 2040، ژمارەی ئەو کەسانەی دەکەونە بەر مەترسیی هەوای پیس، بۆ نیوە کەمبکرێنەوە.
بە گوێرەی راپۆرتەکە، ساڵانە 5 ملیۆن و 700 هەزار کەس بەهۆی هەوای پیسەوە لە سەرانسەری جیهان دەمرن. 95٪یان خەڵکی وڵاتانی هەژار و داهات مامناوەندن.
جێنێڤیەڤ کۆنەرز، بەڕێوەبەری بەشی ژینگە لە بانکی جیهانیباس لەوە دەکات، "خەڵکێکی زۆر هەوای پیس هەڵدەمژن، بە تایبەتی لە وڵاتانی داهات کەم و مامناوەند. زیانی پیسبوونی هەوا لەسەر ئابووری، دەگاتە 5٪ـی کۆی گشتیی بەرهەمی نێوخۆی جیهان. بۆیە پێویستە هەنگاوی بەپەلە بنرێت."
پیسبوونی هەوا، بەشی هەرە زۆری بەهۆی مرۆڤ و کارەکانییەوەیە، لە نێویاندا کشتوکاڵ، پەرەپێدانی شارەکان، ئامرازەکانی هاتووچۆ، پیشەسازی و تەنانەت چێشتلێنان. لە هەندێ ناوچەش، تەپوتۆزی بیابان رۆڵی هەیە.
چارەسەر بۆ ئەمانە، وەک بانکی جیهانی پێشنیازی دەکات، بریتییە لە بەڕێوەبەردنی باشتری شارەکان، کۆکردنەوەی داتا بە شێوەیەکی باشتر و وەبەرهێنانی زیاتر لە پاراستنی ژینگە.