فێستیڤاڵی مەیموون لە تایلاند بەڕێوەدەچێت

 

 

لەو رۆژەدا هەرچی هەمەچەشنی هەیە لە خوانێکدا کۆیدەکەنەوە و لەبەردەم پەرستگەی خمێر پێشکێشی مەیموونەکانی دەکەن.

 

یۆنگیوز، دامەزرێنەری فێستیڤاڵی مەیموون دەڵێت، "ئەم فێستیڤاڵی خوانی مەیموونە بۆنەیەکی سەرکەوتووە و ساڵانە گەشە بە کەرتی گەشتیاری لۆپبووری دەدات."

 

خەڵکی لۆپبووری دەڵێن، فێستیڤاڵەکە لەنێوان مەیموون و مرۆڤ پێکەوەژیان دەهێنێتە کایەوە؛ بەڵام مەیموونەکان دوای تێرخواردنیشیان پەلاماری سەر و دەموچاوی گەشتیارەکان دەدەن و پێداویستییەکانیان لێدەڕفێنن.

 

عایشە، گەشتیار ئاماژە بەوە دەکات، "مەیموونێک لەسەر پشتم بوو، ویستم سێڵفییەک بگرم، بەڵام چاویلکەکەمی رفاند و چووە سەر دیوارەکە. ویستی چاویلکەکە بخوات، بەڵام کاتێک بۆی دەرکەوت کە ناخورێت، بۆی گەڕاندمەوە."

 

سەرەتای فێستیڤاڵی خوانی مەیموون بۆ ساڵی 1980 دەگەڕێتەوە؛ بەگوێرەی رێکخەری فێستیڤاڵەکە، بەهۆی کولتوورە نوێیەکەوە ژمارەی مەیموونەکان لەم چەند ساڵەدا لە 300 دانەوە بۆ 4000 دانە زیادیکردووە.

 

بۆیە لە کۆڵان، شەقام و بازاڕەکانی شارۆچکەی لۆپبووری مەیموون دەبیندرێت و لەلای بەشێک لە تایلاندییەکانیش، بە شاری مەیموونەکان دەناسرێت.