سەرۆکی فەلەستین: ناکرێت ئەم سەرشێتییە بەردەوام بێت

 

رۆژی پێنجشەممە، 26-09-2024، مەحموود عەباس، سەرۆکی دەسەڵاتی فەلەستین لە کۆمەڵەی گشتیی نەتەوە یەکگرتووەکان لە نیویۆرک، گوتارێکی پێشکێش کرد و داوای کرد ناردنی چەک بۆ ئیسرائیل رابگیرێت.

 

سەرۆکی دەسەڵاتی فەلەستین گوتی: "ئەم تاوانە راگرن، هەر ئێستا رایگرن. کوشتنی ژن و منداڵان و ئەم جینۆسایدە راگرن. ناردنی چەک بۆ ئیسرائیل راگرن. ناکرێت ئەم سەرشێتییە بەردەوام بێت."

 

ئەو هەروەها گوتیشی: "ئەوەی بەسەر خەڵکی ئێمە دێت لە غەززە و کەرتی رۆژئاوا، هەموو جیهان لێی بەرپرسیارە."

 

مەحموود عەباس گوتی، ئیسرائیل شایانی ئەوە نییە لە نەتەوە یەکگرتووەکان بێت. ئەو گوتی: "ئیسرائیل بڕیارنامەکانی نەتەوە یەکگرتووەکان جێبەجێ ناکات، بۆیە شایستەی ئەوە نییە لەو رێکخراوە بێت."

 

11 رۆژی دیکە تەمەنی جەنگی غەززە دەبێتە ساڵێکی تەواو، رۆژی 07-10-2023 چەکدارانی بزووتنەوەی حەماس هێرشێکی لەناکاویان کردە سەر چەند ئۆردووگایەکی جوونشینی ئیسرائیل. حکومەتی ئیسرائیل دەڵێت، ئەو رۆژە زیاتر لە 1,200 کەس کوژران و 251 کەسیش بە بارمتە بران. ئیسرائیل بەڵێنی وەڵامدانەوەیەکی تووندی دا و هێشتا نەوەستاوە.

 

بەگوێرەی تەندروستیی کەرتەکە، 41 هەزار و 534 کەس کوژراون و لە 2.4 ملیۆن دانیشتووەکەی ئەو کەرتە، هەموو کەسێک لانیکەم جارێک ئاوارەبووە.

 

نوێترین هێرشی ئیسرائیل بۆ غەززە ئەم بەیانییە بوو کاتێک بۆردوومانی قوتابخانەیەکی کرد. مەحموود بەسەڵ، گوتەبێژی بەرگریی شارستانیی غەززە رایگەیاند: "لە هێرشەکەی سەر قوتابخانەی فەلوجە لە کەمپی جەبالیا لە باکووری غەززە، 15 کەس شەهید بوون، کە منداڵ و ژنیشیان تێدایە."

 

سوپای ئیسرائیل دواتر رایگەیاند چەند پێگە و کەسێکی حەماسیان لە نێو قوتابخانەکە کردووەتە ئامانج.