لە دەنگدانی بەرایی ئەمریکا 26.5 ملیۆن کەس دەنگیانداوە

 

 

کەسانی بەساڵاچوو، نەخۆش، ئەوانەی لە دەرەوەی وڵات کاردەکەن و دەخوێنن، ئەوانەی نایانەوێت لە نۆرە بوەستن یان حەزیان لە کەشوهەوای سارد نییە، دەتوانن زووتر دەنگ بە بەربژێری دڵخوازی خۆیان بدەن.

 

بەگوێرەی تاقیگەی هەڵبژاردن لە زانکۆی فلۆریدا، 1.9 ملیۆن کەس لە ویلایەتی جۆرجیا؛ 1.1 ملیۆن کەس لە مشیگن؛ 1.7 ملیۆن کەس لە کارۆلاینای باکوور و 1.1 ملیۆن کەسیش لە ویلایەتی پێنسلڤانیا دەنگیان داوە. ئەمە لە کاتێکدایە ئەو ویلایەتانە خۆڵەمێشین، واتا خەڵکەکەی خۆیان یەکلا نەکردووەتەوە دەنگی زۆرینە بۆ کام بەربژێر دەبێت.

 

دەنگدانی پێشوەختە سێ جۆری هەیە: رۆیشتن و دەنگدان لە یەکێک لە بنکەکان، ناردنی دەنگ بە پۆستە یانیش بەجێهێشتنی دەنگ لە سندووقێکی تایبەت کە پێی دەگوترێت درۆپ بۆکس.

 

لەو ژمارەیەی دەنگیان داوە، 15 ملیۆن کەس بە پۆستە دەنگیان داوە.

 

لە تەواوی 50 ویلایەتەکەی ئەمریکا، تەنیا لە ویلایەتەکانی میسیسیپی، نیو هامشایەر و ئالابامە رێگە بە دەنگدانی پێشوەختە نادرێت.

 

ماوەی دەنگدانی پێشوەختە لە پێنج رۆژ تاوەکو 50 رۆژە و بەگوێرەی ویلایەتەکان دەگۆڕێت، بەڵام بە گشتی پرۆسەکە 23 رۆژ دەخایەنێت.

 

ئەم ساڵ بۆ یەکەمجار لە 20-09-2024 لە هەردوو شاری فێرفاکس و ئارلینگتنی ویلایەتی ڤێرجینیا، دەنگدانی بەرایی دەستیپێکرد. 

 

لە 20 ساڵی رابردوو خواست لەسەر دەنگدانی پێشوەختە زیادی کردووە. لە هەڵبژاردنی 2000ـدا 16٪ـی دەنگەکان پێشوەختە بوون؛ لە 2004ـدا 22٪ بوو؛ لە ساڵی 2008دا 30٪؛ لە 2012ـدا ٪33؛ لە 2016ـدا ٪40 و لە 2020ـیش بەهۆی کۆرۆناوە رێژەکە بۆ 64٪ بەرزبووەوە.

 

رکابەریی گەرم لە نێوان کامالا هاریس، بەربژێری دیموکراتەکان و دۆناڵد ترەمپ، بەربژێری کۆمارییەکانە. بەگوێرەی دوایین راپرسییەکان، ئەگەر هەڵبژاردن ئێستا بکرێت، کامالا هاریس 48.7 بەدەستدەهێنێت؛ دۆناڵد ترەمیش بە جیاوازیی 0.2 خاڵ لە دواوەیە و ٪48.5 بەدەستدەهێنێت.