کۆنگرەی پارتی ئازادیخوازانی ئەمریکا بەڕێوەدەچێت؛ بەشێکی ئەندامانیان ناڕازین

 

چەیس ئۆلیڤەر، لەنێو پارتی ئازدیخوازانی ئەمریکا لەگەڵ هەشت ئەندامی دیکەی پارتەکەی بەربژێرە بۆ هەڵبژاردنی سەرۆکایەتی و چاوی لەوەیە لەنێو کۆنگرەی نیشتمانیی پارتەکەی خۆیدا دەنگ بهێنێت و لە هەڵبژاردنی سەرۆکایەتی کە بڕیارە لە مانگی نۆڤێمبەری ئەم ساڵ بەڕێوەبچێت، رکابەرایەتی دۆناڵد ترەمپ لە کۆمارییەکان و جۆ بایدن لە دیموکراتەکان بکات.

 

چەیس ئۆلیڤەر، بەربژێر بۆ سەرۆکایەتی ئەمریکا بە رووداوی گوت ''یەکەم شت کە دەمانەوێت بیگۆڕین، پەیوەندیی حکومەتە لەگەڵ خەڵک، خەڵکی زۆر هەن کە پەنجە بۆ حکومەت رادەکێشن و تۆمەتباری دەکەن، بەڵام فەلسەفەی ئازادیخوازەکان ئەوەیە؛ ئەگەر تۆ لە رێگەی هێز و فێڵکردن و تووندوتیژییەوە ئازاری کەس نادەیت، ئازادی چی دەکەیت و خاوەنی ژیان و جەستەی خۆتیت، بازرگانی و موڵکەکان هی خۆتن."

 

بۆیە دەڵێ "ئەگەر ببمە سەرۆک، لێخۆشبوون بۆ ئەو کەسانە دەردەکەم، کە تووندوتیژییان نەکردووە و دەستگیکراون و هیچ هۆکارێک نییە لە زینداندابن. دەستیش دەکەم بە کشاندنەوەی هێزەکانمان لە هەموو جیهاندا، تاوەکو ئاشتی لە جیهان بەدیبهێنم.''

 

پارتی ئازادیخوازانی ئەمریکا، سێیەم گەورەترین پارتی سیاسی ئەمریکایە و خاوەنی نزیکەی 750 هەزار ئەندامە، دەیەوێت لەم کۆنگرەیەیدا لە واشنتن، بەربژێرەکانی بۆ سەرۆکایەتیی ئەمریکا یەکلایی بکاتەوە. 

 

کۆنگرەکەیان بۆ سێ رۆژ بەردەوام دەبێت و ئەوەی جێگەی سەرنجیشە، بێجگە لە بەربژێرەکانی خۆیان، دۆناڵد ترەمپ، بەربژێری کۆمارییەکان و رۆبێرت کەنەدی، بەربژێری سەربەخۆ و نزیک لە دیموکراتەکانیش بەشداری لە کۆنگرەکان دەکەن و گوتار پێشکێش دەکەن، کە ئەمە جێگەی نیگەرانیی بەشێک لە ئەندامەکانیانە.

 

وێس بێندیکت، ئەندامی پارتی ئازادیخوازانی ئەمریکا گوتی ''بەڵێ، زۆربەی ئەندامەکانی وەک من، بێهوابوون لەو بڕیارە، ئێمە پارتی ئازادیخوازەکانین و بەپێی یاسا، پێویستە وەک لایەنێکی سیاسی جیاواز کاربکەین و پشتیوانی لە بەربژێرەکانی خۆمان بکەین."

 

بە بڕوای بێندیک گونجاو نەبووە بەربژێری پارتەکانی دیکە یان سەربەخۆکان بانگهێشت بکەن و لەم کۆنگرەیەدا بەشداربن، چونکە ئەمە وەک کامپەینێکی هەڵبژاردنی لێدێت بۆ ئەوان، بۆیە دەڵێ "پێم وانییە پێویست بکات ئەوان لێرە بن."

 

لە ئەمریکا، بێجگە لە پارتی کۆماری و دیموکراتەکان، نزیکەی 420 پارتی دیکەی سیاسی تۆمارکراون. پارتی ئازادیخوازەکانی ئەمریکا، سێیەم گەورە پارتی سیاسییە و لە ساڵی 1971ـەوە دامەزراوە، بەڵام هیچ کاتێک بەربژێرەکانیان نەیانتوانیوە لە هەڵبژاردنی گشتیی ئەمریکادا کێبرکێی کۆماری و دیموکراتەکان بکەن، تەنیا لە هەندێک ویلایەت نەبێت ئەویش لە هەڵبژاردنە خۆجێییەکان.