یەک ملیۆن کەس لە دەرەوەی تورکیا لە گەڕی دووەمی هەڵبژاردنی سەرۆککۆمار دەنگیان داوە

 

 

دەستەی باڵای هەڵبژاردنەکانی تورکیا شەوی رابردوو بڵاویکردەوە، تاوەکو کاژێر 19:35 خولەکی رۆژی یەکشەممە 21-05-2023 یەک ملیۆن و 38 کەس لە دەرەوەی وڵات لەمیانی بەشداریکردنیان لە گەڕی دووەمی هەڵبژاردنی سەرۆکایەتیی کۆماردا دەنگیان داوە.

 

ئەم دەنگدانە رۆژی شەممە 20ی ئایار لە دەرەوەی تورکیا دەستیپێکرد و لە نوێنەرایەتییەکانی تورکیا لە دەرەوە تاوەکو رۆژی 24ی ئایار و لە دەروازە سنوورییەکانیش تاوەکو کاژێر 17:00ی رۆژی یەکشەممە 28ی ئایار بەردەوام دەبێت.

 

لە گەڕی یەکەمی هەڵبژاردنی سەرۆککۆمار و پەرلەمانی تورکیا کە رۆژی 14ی ئایار بەڕێوەچوو، رەجەب تەیب ئەردۆغان، سەرۆکی ئاکپارتی و سەرۆککۆماری تورکیا کە لە هەمان کاتدا بەربژێری هاوپەیمانیی جمهوورە، 49.52%ی دەنگەکان و کەمال کڵچدارئۆغڵو، سەرۆکی جەهەپە و بەربژێری هاوپەیمانیی میللەت 44.88%ی دەنگەکانیان بەدەستهێنا.

 

بە هۆکاری ئەوەی هیچکام لە بەربژێرەکانی سەرۆککۆمار 50 کۆ یەکی دەنگەکانیان بەدەستنەهێنا، هەڵبژاردنی سەرۆکایەتی کەوتە گەڕی دووەم، کە بڕیارە 28ی ئایار بەڕێوەبچێت.