رووسیا 27 تۆن خۆراک بۆ غەززە دەنێرێت

 

ئەمڕۆ (پێنجشەممە، 19-10-2023) کەناڵی تەلەگرامی فەرمیی وەزارەتی فریاگوزاریی رووسیا رایگەیاند "فڕۆکەیەکی جۆری ئیلیوشن ئای ئێل-76، کە بڕی 27 تەن خۆراکی هەڵگرتبوو، لە فڕۆکەخانەی عەریشی میسر نیشتەوە. خۆراک و پێداویستییەکان بۆ خەڵکی غەززەن."

 

لە بەشێکی دیکەی راگەیێندراوەکەدا هاتووە، "فڕۆکەکە ئارد، برنج، شەکر و پاستای بارکردووە و دەدرێتە رێکخراوی خاچی سووری میسری بۆ ئەوەی بیانگەیێنێتە خەڵکی غەززە." 

 

ناردنی ئەو فڕۆکەیە دوای ئەوە دێت؛ میسر، ئەمریکا و ئیسرائیل رۆژی چوارشەممە رێککەوتن لەسەر کردنەوەی خاڵی سنووریی رەفەح بۆ ناردنی پێداویستیی مرۆیی بۆ کەرتی غەززە.

 

سنووری رەفەح خاڵی بەستنەوەی کەرتی غەززە و میسرە، تاکە دەروازەی هاتنی کەلوپەل و کەرەستەیە لە دەرەوە بۆ نێو کەرتەکە، هەروەها تاکە رێگەی دەرچوونی خەڵکە لە غەززەوە بێ ئەوەی بچنە خاکی ئیسرائیل.

 

وەزارەتی بەرگری شارستانی، فریاکەوتن و نەهێشتنی لێکەوتەکانی کارەساتە سرووشتییەکانی رووسیای فیدرال ناسراو بە وەزارەتی فریاگوزاریی رووسیا، ساڵی 1994 لەلایەن سەرۆکی ئەوکاتی رووسیا بۆریس یەڵتسین دامەزراوە و کاری دابینکردنی یارمەتی و بەهاناوەچوونە لە بارە لەناکاوەکاندا، وەزارەتەکە لە 7 بەشی سەرەکی پێکدێت و بەشی "هاوکاریی نێودەوڵەتی" یەکێکیانە.