کۆریای باشوور دەڵێت پیۆنگیانگ مووشەکی کیشوەربڕی تاقیکردووەتەوە

 

رۆژی هەینی 18-11-2022، فەرماندەیی هێزەکانی سوپای کۆریای باشوور رایگەیاند، هاوێشتنی مووشەکێکی کیشوەربڕیان لەلایەن کۆریای باکوورەوە هەستپێکردووە. هاوکات ژاپۆنیش بە فەرمی تاقیکردنەوە مووشەکییەکەی پشتڕاستکردەوە. 

 

مووشەکەکە لەنێو سنوورە ئاوییەکانی ژاپۆن کەوتووەتە خوارەوە و پاسەوانی دەریایی داوایان لە کەشتییەکان کردووە لە پاشماوەی مووشەکەکە نزیکنەبنەوە. 

 

ئەو تاقیکردنەوە مووشەکییەی کۆریای باکوور رۆژێک دوای تاقیکردنەوەی مووشەکێکی کورت مەودای بالیستی دێت لەلایەن ئەو وڵاتەوە. چۆ سون هوی، وەزیری دەرەوەی کۆریای باکوور دەڵێت، ئەگەر ئەمریکا بەردەوامبێت لە "بەرپەرچدانەوەی بەردەوامی" هاوپەیمانانیان لە ناوچەکە، ئەوە جموجووڵی سەربازی "تووندتر"یان دەبێت. 

 

ئادریان واتسۆن، گوتەبێژی ئەنجوومەنی ئاسایشی نیشتمانی ئەمریکا رایگەیاند، ویلایەتە یەکگرتووەکانی ئەمریکا بە "تووندی سەرکۆنەی" هێرشە مووشەکییە بالستییەکە دەکات؛ ژاپۆن دەڵێت، مووشەکەکە توانای گەیشتنی بە خاکی ئەمریکا هەبووە. 

 

ئادریان واتسۆن دەشڵێت: "سەرۆک لەبارەی دۆخەکەوە قسەیکردووە و ئێستا لەگەڵ تیمەکانی ئاسایشی نیشتمانی و هاوبەشەکانی لە گفتوگۆدایە." هاوکات دەشڵێت، "ئەم تاقیکردنەوەیە پێشێلکارییەکی بێ شەرمانەیە بۆ چەندین یاسای ئەنجوومەنی ئاسایشی نەتەوەیەکگرتووەکان و گرژی و مەترسی ناسەقامگیری دەکاتە سەر دۆخی ئاسایشی ناوچەکە." 

 

لە ماوەی رابردوودا ئەمریکا، ژاپۆن و کۆریای باشوور مانۆڕە سەربازییەکانیان چڕکردووەتەوە و ئەوەش کۆریای باکووری تووڕەتر کردووە. جۆ بایدن، سەرۆکی ئەمریکا لە لوتکەی G20 نیگەرانی ئەمریکای لەبارەی تاقیکردنەوە مووشەکیەکانی کۆریای باکوور لەگەڵ شی ژینگ پینگ تاوتوێکرد. هەروەها لەگەڵ سەرکردەکانی کۆریای باشوور و ژاپۆن باسی لە مەترسییەکانی تاقیکردنەوەی ئەتۆمیی حەوتەمی لەلایەن کۆریای باکوورەوە کردووە. 

 

هان کۆن هی، بەڕێوبەری فۆرومی ستراتیژی مووشەک دەڵێت، ئەگەر ئەو مووشەکەی تاقیکراوەتەوە مووشەکبڕ بێت، "ئەوە بە دڵنیاییەوە پەیامێکی روونە بۆ ژاپۆن و ئەمریکا" کە چالاکییە سەربازییەکانیان لەو ناوچەیە کەمتربکەنەوە.