رووداو لە بەرەکانی پێشەوەی هەرێمی دۆنێتسک رووماڵی جەنگ دەکات؛ چۆن بریندارەکان چارەسەر دەکرێن؟

 

دوای چارەسەری سەرەتایی، بریندارەکان رەوانەی نەخۆشانە کران. لە یەکێک لە بنکە تایبەتەکانی بەرەکانی پێشەوەی شەڕ، کە تایبەتە بە چارەسەرکردنی سەرەتایی، 25 پزیشکی سەربازی کاردەکەن.

 

نەقیب ئۆلێکسی، بەرپرسی خزمەتگوزارییە پزیشکییەکانی لیواکان باسی یەکێک لە بریندارەکان دەکات و دەڵێت، "بەهۆی تەقینەوە بریندار بووە و لە ئەنجامی ئەوەدا ساچمە بەر قاچی کەوتووە، هەروەها برینێکی قووڵ لەدەستی دروست بووە و یەک لە ئەنگوستەکانی پەڕیوە، ئێستا دۆخی جێگیرە، بەڵام خوێنی زۆری لەدەست داوە و ئێمە لێرە خوێنمان پێدا و دەگوازرێتەوە بۆ نەخۆشخانە. ئەوەی کە لە ژووری سێیەمە ساچمەکە چووەتە ناو جەستەی و دۆخی باش نییە، دەبێت یەکسەر بگوازرێتەوە بۆ نەخۆشخانە".

 

لە یەکێک لە بەرەکانی دیکەی شەڕ، رووداو وێنەی دوو برینداری دیکە دەگرێت کە یەکێکیان ساچمە بەر قاچ و ئەوی دیکە بەردەستی کەوتووە. ڤۆڵۆدیمیری تەمەن 43 ساڵ، یەکێک لە بریندارەکانە و پێشتر لە کارگەیەکی دروستکردنی پرد کاری دەکرد، بەڵام دوو مانگە چووەتە ریزی هێزەکانی ئۆکراینا.

 

ڤۆلۆدیمیر لینسکۆ، سەربازی ئۆکراینی بە رووداوی گوت، "بۆردوومانێکی بەهێز بوو و، ساچمەیەک سەرەتا لە دارەکانی دا و دوایی بەشێکی بەردەستی من کەوت و بریندار بووم. من یەکسەر چوومەوە نێو ئەو چاڵەی کە بۆ پاراستنی خۆمان دروست مان کردووە و لەوێوە سەیرم دەکرد بزانم هێزەکانی رووسیا دێن یان نا!"

 

یەکێک لە بنکە تەندروستییەکان لە بەرەکانی پێشەوەی هەرێمی دۆنێتسک کە لەدوای کشانەوەی هێزەکانی رووسیا لە مانگی 10ی ساڵی رابردوو دروستکراوە، دەرمان و پێداویستییەکانیان لە لایەن حکومەت و رێکخراوەکانەوە دابین دەکرێت و لە زۆربەی زۆنەکانی شەڕ بۆ چارەسەری خێرا، بنکەی لەو شێوەیە دانراون.